Երևանի «Ավանգարդ» հյուրանոցի տարածքում Նոր Հաճն քաղաքի 35-ամյա բնակչի սպանության մեջ մեղադրվող, հետախուզման մեջ գտնվող անձը հայտնաբերվել է և կալանավորվել, հայտնում է Քննչական կոմիտեն։ Գերատեսչությունը հրապարակել է միայն նրա անվան ու ազգանվան սկզբնատառերը՝ Կ.Մ.
ՔԿ-ն հիշեցնում է, որ 2024թ․ մայիսի 1-ի երեկոյան անգիտակից վիճակում, կրծքավանդակի ձախ կեսի կտրած-ծակած վերքով «Սուրբ Գրիգոր Լուսավորիչ» ԲԿ էր տեղափոխվել Գևորգ Նազարյանը, որը ժամեր անց, գիտակցության չգալով, մահացել է։
Գերատեսչության տվյալներով՝ կյանքի հետ անմահատեղելի մարմնական վնասվածքը Նազարյանին հասցրել է Նոր Հաճն քաղաքի բնակիչ Կ․Մ․-ն։
«Կ․Մ․-ն հեռախոսազրույց է ունեցել Նազարյանի հետ, որի ընթացքում վերջինիս կողմից հնչեցրած արտահայտությունների կապակցությամբ պարզաբանումների նպատակով Ա․ Հ․-ի և ավտոմեքենայում գտնվող ևս մեկ անձի հետ ավտոմեքենայով գնացել է Երևան քաղաքի Աճառյան փողոցում գործող «Ավանգարդ» հյուրանոցային համալիրի մոտ։ Ծավալված խոսակցությունը վերածվել է վիճաբանության, որի ընթացքում Կ․ Մ․-ն, սպանելու դիտավորությամբ, իր մոտ գտնվող սուր, ծակող-կտրող գործիքով հարվածել է Նազարյանի կրծքավանդակի ձախ կեսին և վերջինիս առողջությանը պատճառել կյանքի հետ անհամատեղելի վիրավորում։ Այնուհետև, Ա․ Հ․-ն Կ․Մ․-ի բացահայտմանը խոչընդոտելու նպատակով իր կողմից շահագործվող ավտոմեքենայով նրան տեղափոխել է այլ վայր»,- ասվում է հաղորդագրության մեջ։
Հանրային քրեական հետապնդում է հարուցվել Կ․ Մ․-ի նկատմամբ՝ ՀՀ քրեական օրենսգրքի 155-րդ հոդվածի 1-ին մասով (սպանություն, պատժվում է ազատազրկմամբ` առավելագույնը 15 տարի ժամկետով), իսկ Ա․Հ․-ի նկատմամբ՝ ՀՀ քրեական օրենսգրքի 474-րդ հոդվածի 1-ին մասով (hանցանք կատարած անձին աջակցելը, պատժվում է ազատազրկմամբ` առավելագույնը 2 տարի ժամկետով)։
Մայիսի 2-ին Ա․Հ․-ն ձերբակալվել է։ Կ․Մ․-ի նկատմամբ հայտարարվել է հետախուզում։
ՔԿ-ն հավելում է, որ հուլիսի 23-ին Կ․ Մ․-ն հայտնաբերվել է Սյունիքի մարզի Ագարակ քաղաքում և կալանավորվել։