Հայաստանի խորհրդարանի նախկին խոսնակ Արթուր Բաղդասարյանը և նրա ընտանիքի անդամները հրավիրվել են Գլխավոր դատախազություն՝ գործի նյութերին ծանոթանալու համար, հայտնում է azdarar.am-ը։ Բաղդասարյանը հրավիրվել է իրեն պատկանող գույքի ապօրինի ծագման հետաքննության շրջանակներում, պարզաբանել է կայքը։
Ծանուցագրում նշվում է, որ Գլխավոր դատախազության ստուգման արդյունքներով Բաղդասարյանի և նրա ընտանիքի անդամների անվամբ գրանցված գույքը ենթակա է բռնագանձման։ Վերահսկող մարմինը չի հստակեցնում, թե ինչ գույքի մասին է խոսքը։
«Ղեկավարվելով «Ապօրինի ծագում ունեցող գույքի բռնագանձման մասին» օրենքի 16-րդ և 17-րդ հոդվածներով՝ ծանուցվում է, որ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունում Բաղդասարյանին պատկանող գույքի առնչությամբ իրականացվում է ուսումնասիրություն, որի արդյունքում կազմվել է ամփոփագիր, ինչի հիման վրա այս անվամբ հաշվառված գույքը հանդիսանում է բռնագանձման առարկա»,- ասված է ծանուցագրում։
Բաղդասարյանը և նրա ընտանիքի անդամները հոկտեմբերի 29-ին պետք է ներկայանան գերատեսչություն։
Բաղդասարյանը 2003-2006 թվականներին զբաղեցրել էր Ազգային ժողովի նախագահի պաշտոնը։ 1997 թվականին հիմնել էր «Օրինաց երկիր» կուսակցությունը։ 2016 թվականի փետրվարին «Հայկական վերածնունդ» կուսակցության հիմնադիր համագումարում ընտրվել էր կուսակցության նախագահ։
