ԵՄ առաքելությունը նոր գործառնական կենտրոններ կբացի Կապանում, Իջևանում և Եղեգնաձորում, ասել է EUMA-ի ղեկավար Մարկուս Ռիտերը, հայտնում է Հայաստանում ԵՄ պատվիրակության մամուլի ծառայությունը։ Նա մանրամասնել է, որ առաքելությունը նախատեսում է կենտրոնները բացել առաջիկա ամիսներին։
«Մեր նպատակն է նպաստել սահմանամերձ շրջանների անվտանգության կայունացմանը։ Շատ հայ պաշտոնյաների կարծիքով, EUMA-ն նպաստել է իրավիճակի որոշակի կայունացմանը։ Սակայն իրավիճակը մնում է անկայուն»,- ասել է Ռիտերը:
Նրա խոսքով, աշխատանքի մեկնարկից ի վեր առաքելությունը ընդհանուր առմամբ ավելի քան 300 պարեկություն է իրականացրել Գորիսի, Ջերմուկի և Մարտունիի իր կենտրոններից։ Պարեկներն ամեն շաբաթ անցնում են ավելի քան 3 800 կմ:
Փետրվարի 20-ին Եվրամիությունը գործարկեց քաղաքացիական առաքելությունը Հայաստանում (EUMA)՝ որպես Միասնական անվտանգության և պաշտպանության քաղաքականության մի մաս։ Առաքելության կենտրոնակայանը գտնվում է Եղեգնաձորում, ունի վեց օպերատիվ բազա և կապի փոքր գրասենյակ Երևանում։
