ՀՀ վարչապետ Նիկոլ Փաշինյանը հայտարարել է, որ Հայաստանի Հանրապետության զինանշանը կապ չունի 1991 թվականին հիմնադրված Հայաստանի պետականության հետ։
«Ի՞նչ է պատկերված մեր զինանշանի վրա՝ Նոյան տապանն Արարատ լեռան վրա, Հայաստանի չորս տոհմերի զինանշանները։ Վերջերս, երբ նայում եմ այս զինանշանին, հարց է ծագում՝ մեզանից յուրաքանչյուրի համար սրբավայր հանդիսացող պատկերն ինչպե՞ս է կապված 1991 թվականին հիմնադրված պետության հետ, ինչի՞ մասին է։ Նոյան տապան, որը գտնվում է Արարատ լեռան վրա, իսկ Հայաստանի Հանրապետության այսօրվա տարածքը ջրի տակ է։ Առյուծ, որը բնական պայմաններում վաղուց Հայաստանում չէ… »,- խորհրդարանում ասել է վարչապետը։
Ըստ նրա՝ քննարկվող խնդիրը վերաբերում է «պատմական և իրական Հայաստանի միջև տատանմանը», որը կա Հայաստանում բոլորի մոտ։ «Մեր փաստարկը վերաբերում է հետևյալին. իրական Հայաստանը պետք է ծառայի պատմական Հայաստանին, թե՞ պատմական Հայաստանը պետք է ծառայի իրական Հայաստանին։ Այս քաղաքական ու դարաշրջանային հարցն է, որին մենք պետք է պատասխան տանք»,- նշել է նա։
Փաշինյանը նաև հետաքրքրվել է՝ «մենք մտածե՞լ ենք, թե ինչպես է այս պատկերը կապված Հայաստանում յուրաքանչյուր ընտանիքի, յուրաքանչյուր երեխայի, ծնողի հետ» և «ի՞նչ է ասում ապագայի մասին»։ Նա հիշեցրել է ԱԺ ընդդիմադիր «Հայաստան» խմբակցության պատգամավոր Գեղամ Մանուկյանի հայտարարությունը, որ եթե Հայաստանի իշխանությունները «կադաստրի մասին փաստաթուղթ» են փնտրում, ուրեմն զինանշանն է։ «Եթե մենք հայտարարում ենք, որ սա մեր փաստաթուղթն է կադաստրի մասին, նշանակում է, որ մենք հայտարարելու ենք՝ ոչնչացրեք մեզ»,- ասել է Փաշինյանը։
