ՆԳՆ-ն ու Փաստաբանների պալատը մոտ օրերս կստորագրեն հուշագիր. կողմերը հանդիպել են

Հայաստանի Հանրապետության ՆԳՆ-ն և Փաստաբանների պալատը, քննարկելով Ոստիկանության Երևան քաղաքի Էրեբունու և Կենտրոնական բաժինն

երում 2023 թ. փետրվարին և հունիսին արձանագրված ոստիկանների և փաստաբանների հետ կապված միջադեպերը, հայտարարում են՝

 

1. Կողմերը կարևորում են փաստաբանության և ոստիկանության ինստիտուտների դերակատարումը Հայաստանի իրավական համակարգում։

 

2. Կողմերը անընդունելի են համարում բռնությունների ցանկացած դրսևորում։

 

3. Ներքին գործերի նախարարությունը ծառայողական քննությունների արդյունքներով իր գնահատականը տվել է Էրեբունու բաժնում տեղի ունեցած միջադեպին, իսկ Կենտրոնական բաժնում տեղի ունեցած միջադեպը գտնվում է ծառայողական քննության ընթացքում։

 

4. Ներքին գործերի նախարարությունը հավաստիացնում է, որ միջադեպերին ներգրավված ոստիկանության ծառայողների արարքներին կտրվի պատշաճ իրավական գնահատական՝ ապահովելով բազմակողմանի, լրիվ և օբյեկտիվ ուսումնասիրություն։

 

5. Ներքին գործերի նախարարությունը և Փաստաբանների պալատը կստեղծեն ոստիկանության ծառայողներից և փաստաբաններից կազմված հանձնախումբ՝ նման իրավիճակներում օպերատիվ արձագանքելու, փոխադարձ քննարկումներ, վերապատրաստման դասընթացներ կազմակերպելու, ինչպես նաև ոստիկանության ծառայողների և փաստաբանների վարքագծի հետ կապված հարցերը քննարկելու նպատակով:

 

6․ Ներքին գործերի նախարարությունը և Փաստաբանների պալատը մոտ օրերս կստորագրեն համագործակցության հուշագիր:

 

Հիշեցնենք, որ Փաստաբանների պալատը եռօրյա գործադուլ էր հայտարարել ոստիկանապետի հրաժարականի պահանջով: Պատճառը ոստիկանությունում փաստաբաններին ծեծի ենթարկելու դեպքերն են: Նրանք Փաստաբանների պալատի վարչական շենքի մոտակայքից քայլերթով գնում են դեպի Ներքին գործերի նախարարություն՝ ոստիկանապետ Արամ Հովհաննիսյանի հրաժարականի պահանջով, իրենց հետ տանում են մեծադիր պաստառ, որը հանձնելու են ոստիկանապետին: Դա «Փաստաբանության թշնամի» հավաստագիրն է: