Հայաստանի վարչապետի աշխատակազմի ղեկավար Արայիկ Հարությունյանը, որն անհետացել է տեսադաշտից՝ չմասնակցելով անգամ 2024 թվականի բյուջեի քննարկմանը, արձակուրդում էր, գրում է «Ժողովուրդ»-ը։
Աղբյուրը գրում է, որ երկար դադարից հետո Հարությունյանի մասին տեղեկությունն առաջին անգամ հայտնվել է նոյեմբերի 23-ին՝ ՀՀ կառավարության կայքում։ «Ժողովուրդ»-ը գրում է, որ Շվեյցարիայի զարգացման և համագործակցության գործակալության (ՇԶՀԳ) Հարավային Կովկասի համագործակցության տարածաշրջանային տնօրեն Բարբարա Բոենի Սլաթսի ղեկավարած պատվիրակությանն ընդունելիս Հարությունյանը բավականին հյուծված տեսք ուներ:
Թերթը նշել է, որ Հարությունյանը չի ներկայացել նաև նոյեմբերի 23-ին Երևանում կայացած բռնցքամարտի աշխարհի երիտասարդական առաջնության բացմանը։ «Չնայած նա միշտ եղել է միջոցառման կազմկոմիտեի ղեկավարը։ Այս անգամ սպորտի նախարարության ղեկավար Ժաննա Անդրեասյանն է կարծես գլխավորել միջոցառման կազմկոմիտեն։ Թե ինչու է դա տեղի ունեցել, դեռ հայտնի չէ»,- եզրափակել է «Ժողովուրդ»-ը։
