Լեմկինի ցեղասպանության կանխարգելման ինստիտուտն Իսրայելի վարչապետ Բենիամին Նեթանյահուի կառավարությանը մեղադրել է քրիստոնյաների նկատմամբ բռնության մթնոլորտին աջակցելու մեջ, որը հանգեցրել է Երուսաղեմի հայկական թաղամասի վրա հարձակումներին։
«Վարչապետ Նեթանյահուի ծայրահեղ աջ կառավարության կողմից հովանավորվող Իսրայելի քրիստոնյաների նկատմամբ բռնության մթնոլորտի համատեքստում, Գազայի հատվածում և Հորդանան գետի Արևմտյան ափում պաղեստինցիների դեմ շարունակվող ցեղասպանությունը, հայկական թաղամասի վրա հարձակումները դիտարկվում են որպես պաղեստինյան տարածքներում միատարր հրեական պետություն ստեղծելու իսրայելական ծայրահեղականների հերթական փորձ»,- ասվում է ինստիտուտի հայտարարության մեջ:
Լեմկինի ինստիտուտը միջազգային կազմակերպություններին և ՄԱԿ-ին կոչ է արել վերահսկել իրավիճակը 1600-ամյա թաղամասում և բնակիչներին պաշտպանել բռնություններից։ Նա զգուշացրել է, որ հենց նման իրադարձություններն են ստեղծում զանգվածային վայրագությունների և ցեղասպանության համար նպաստավոր պայմաններ։
Ավելի վաղ ֆրանսիական միջազգային France 24 լրատվական ալիքը նույնպես Հին քաղաքում լարվածության աճը կապել էր Իսրայելում ծայրահեղ աջերի իշխանության գալու հետ։
2023 թվականի դեկտեմբերին ինստիտուտը կոչ էր արել Միացյալ Նահանգներին միջամտել Հայ առաքելական եկեղեցու Երուսաղեմի պատրիարքարանի և Xana Capital ընկերության միջև Երուսաղեմի հայկական թաղամասի «Կովերի այգի» վայրի շուրջ վիճահարույց գործարքին։ Դեկտեմբերի 28-ին մոտ 30 սադրիչներ «Կովերի այգում» հարձակվել էին հայերի վրա, ինչի համար պատրիարքարանը մեղադրել է Xana Capital-ի ղեկավարությանը։
