ԶԼՄ-ներին հայտնի է դարձել Եվրախորհրդից դուրս գալու Բաքվի մտադրության մասին

Բաքուն կքննարկի Եվրախորհրդից դուրս գալու ընթացակարգը՝ ի պատասխան Խորհրդարանական վեհաժողովի կողմից իր պատվիրակության լիազորությունները սահմանափակելուն, հայտնում են ադրբեջանական լրատվամիջոցները՝ վկայակոչելով իրենց աղբյուրները։

Ադրբեջանը կարող է նաև հրաժարվել Մարդու իրավունքների եվրոպական դատարանի իրավասության ճանաչումից՝ Բաքվի նկատմամբ ԵԽԽՎ-ի «անարդար և կողմնակալ» վերաբերմունքի պատճառով։

Հունվարի 22-ին ԵԽԽՎ-ն վիճարկել էր ադրբեջանական պատվիրակության լիազորությունները՝ կապված սեպտեմբերյան հարձակումից հետո Լեռնային Ղարաբաղից հայերի բռնի տեղահանման, քաղբանտարկյալների մեծ թվի և նախագահական ընտրություններին դիտորդական վեհաժողովի հրավեր չլինելու հետ:

Հունվարի 24-ին ադրբեջանական պատվիրակությունը դադարեցրել էր աշխատանքը վեհաժողովում և իր լիազորությունները վիճարկելու նախաձեռնությունն անվանել «Ադրբեջանի ներկայիս ընտրական գործընթացին չարդարացված միջամտության փորձ»: Նույն օրը ԵԽԽՎ-ն 76 կողմ, 10 դեմ ձայների հարաբերակցությամբ որոշել էր չվավերացնել ադրբեջանական պատվիրակության լիազորությունները։