Ներկա պատմական պահը պետք է օգտագործենք թշնամության էջը փակելու համար․ Միրզոյան

Մենք պետք է օգտագործենք ներկա պատմական պահը թշնամության էջը փակելու համար, Կիպրոսի ԱԳ նախարար Կոնստանտինոս Կոմբոսի հետ համատեղ ասուլիսի ժամանակ անդրադառնալով Հայաստանի և Ադրբեջանի բանակցություններին՝ հայտարարել է ՀՀ ԱԳ նախարար Արարատ Միրզոյանը։

Ըստ Միրզոյանի՝ թշնամության էջը փակելը «կօգնի նախապատրաստվել կարևոր խաչմերուկում գտնվող ողջ տարածաշրջանի տնտեսական զարգացմանն ու բարգավաճմանը»։

«Հայաստանը հավատարիմ է խաղաղությանն ու կայունությանը։ Մեր հանձնառությունն արտացոլված է նաև մեր անմիջական հարևանությամբ՝ Հարավային Կովկասում կայուն խաղաղություն հաստատելու տեսլականում։ Մեր հանձնառությունն ավելի է զարգացել նաև սահմանային միջադեպերի, ինչպես նաև սպառազինությունների վերահսկման մեխանիզմներ ստեղծելու մեր առաջարկներով, որոնց պատասխանները դեռ չենք ստացել, բայց դրանք դեռ ուժի մեջ են»,- հավելել է Միրզոյանը։

Հունիսի 4-ին ՀՀ ԱԳՆ-ն հայտնել էր, որ Երևանը պատասխանել է խաղաղության պայմանագրի նախագծի վերաբերյալ Բաքվի վերջին առաջարկներին՝ ուղարկելով լրամշակված 9-րդ խմբագրությունը։ Հունիսի 5-ին Ադրբեջանի ԱԳՆ-ն հայտարարել էր, որ Երևանն ստացել է խաղաղության պայմանագրի վերաբերյալ առաջարկությունների հերթական փաթեթը։

Հունիսի 7-ին Հայաստանի ԱԳՆ-ն հայտարարել էր, որ պատրաստ է ինտենսիվ աշխատել համաձայնագրով չլուծված հարցերի պարզաբանման և մեկ ամսվա ընթացքում այն ​​ստորագրելու ուղղությամբ։ Հունիսի 6-ին Ադրբեջանի նախագահ Իլհամ Ալիևը Երևանի և Բաքվի միջև խաղաղության պայմանագրի ստորագրումն առանց Հայաստանի սահմանադրության փոփոխության «անհնար էր» անվանել։

Հունիսի 15-ին ՀՀ վարչապետ Նիկոլ Փաշինյանը հայտնել էր, որ Ադրբեջանին առաջարկել է ձևավորել հրադադարի ռեժիմի խախտման հետաքննության երկկողմ մեխանիզմ։