Ամերիկահայ գործարար, «Ավրորա» մարդասիրական նախաձեռնության և «Հայաստան-2041» հիմնադրամի համահիմնադիր Նուբար Աֆեյանը կարևոր է համարել Հայաստանի զարգացմանն ուղղված ծրագրերում կառավարության հետ համագործակցությունը։
«Հայաստան 2041» հիմնադրամի «Ուժեղ Սփյուռք» դրամաշնորհային ծրագրի շնորհանդեսից հետո նա Armenia Today-ին այսպես է մեկնաբանել Հայաստանի իշխանությունների՝ «Ուժեղ Սփյուռք» ծրագրի նկատմամբ ունեցած վերաբերմունքի և համագործակցության պատրաստակամության մասին հարցին։
Աֆեյանի խոսքով՝ 24 տարի շարունակ իշխանությունների հետ համագործակցության ուղիներ է գտել՝ անկախ նրանց մտածելակերպից, մոտեցումներից և իր ծրագրերի նկատմամբ ունեցած կասկածներից:
«Կարևոր է համագործակցությունը կառավարության հետ։ Նոր սերնդի շատ մասնագետների եմ տեսել կառավարությունում, ովքեր ցանկանում են եռանդով մասնակցել մեր նախագծերին»,- ասաց նա։
Գործարարը օրինակ բերեց Հայաստանի գիտության և տեխնոլոգիաների (FAST), ինչպես նաև «Հենար» հիմնադրամների և կառավարության ու պետական մարմինների համագործակցությունը։ Նա նշել է, որ հոկտեմբերի 1-ին «Հենար» և «Philips» հիմնադրամների, ինչպես նաև ՀՀ առողջապահության և ՀՀ ներքին գործերի նախարարությունների, Հայաստանի սրտաբանների ասոցիացիայի և Շտապօգնության ծառայության աջակցությամբ մեկնարկել է ծրագիր, որը բարձրացնելու է Երևանում սրտի հանկարծակի կանգից փրկվելու հավանականությունը։
«Եթե Երևանում ինչ-որ մեկը սրտի կաթված ստանա, 6 րոպեի ընթացքում օգնությունը կտրամադրվի։ Դա շատ երկրներում և քաղաքներում չկա, բայց երեկվանից գոյություն ունի Երևանում»,- հավելեց Աֆեյանը։
Անդրադառնալով «Ուժեղ Սփյուռք» ծրագրին՝ Աֆեյանն, ի պատասխան Armenia Today-ի հարցին, նշեց, որ ծրագրի շարունակությունը կախված է ընթացքից։
«Մենք 1 տարեկան երեխա եք տեսնում։ Պետք է տեսնենք, որ մեծանա՝ ուր կհասնի։ Հաջողելու դեպքում կարող ենք ընդլայնել, բայց ծրագիրը չշարունակելու պատճառ չունենք։
«Հայաստան 2041» հիմնադրամի «Ուժեղ Սփյուռք» դրամաշնորհային ծրագրի մրցույթի կազմակերպիչները հայտնեցին, որ 174 հայտ են ստացել։ Դիմում-հայտ է գրանցվել շուրջ 26 երկրի 91 քաղաքներից՝ ԱՄՆ-ից մինչև Լիբանան, Ավստրալիայից մինչև Արգենտինա: Նրանցից ընտրել են 20 նախագծերի հեղինակների, որոնք ստանալու են 10.000 ԱՄՆ դոլար դրամաշնորհ՝ իրագործելու հայկական ժառանգության պահպանմանն ու հայ համայնքների հզորացմանն ուղղված իրենց գաղափարները։
Մանրամասները՝ տեսանյութում։