«Քաղաքացիական պայմանագիր» կուսակցության վերահսկող հանձնաժողովը հոկտեմբերի 15-ին ԱԺ-ում ՔՊ պատգամավոր Հովիկ Աղազարյանի և Քննչական կոմիտեի ղեկավար Արգիշտի Քյարամյանի վեճից հետո «հարցաքննության» են կանչել նաև ՔՊ պատգամավոր Արփի Դավոյանի օգնական Ներսես Խաչատրյանին և պատգամավոր Նարեկ Զեյնալյանին, գրել է «Հրապարակ» օրաթերթը՝ հղում անելով իր աղբյուրներին։
«Խաչատրյանը միջադեպի «մեղավորն» է, որի ռեպլիկին արված կոշտ դիտողության առիթով Աղազարյանը նկատողություն էր արել Քյարամյանին, և վեճը թեժացել էր»,- ասված է հրապարակման մեջ։
«Հրապարակը» հոկտեմբերի 19-ին գրել էր, որ ՔՊ-ն միջադեպի առնչությամբ «հարցաքննության» էր կանչել Աղազարյանին։ Թերթը հոկտեմբերի 22-ին հայտնել էր, որ ՔՊ-ն մտադիր է բացատրության կանչել նաև Քյարամյանին։
Աղազարյանն ու Քյարամյանը վիճաբանել էին հոկտեմբերի 15-ին՝ Հայաստանում հանցավորության հետ կապված իրավիճակի վերաբերյալ խորհրդարանական լսումների ժամանակ, երբ Աղազարյանը ՔԿ ղեկավարին կոչ էր արել դադարեցնել կալանքը որպես բիզնեսի վրա ճնշում գործադրելու միջոց։
ԶԼՄ-ն հոկտեմբերի 16-ին գրել էր, որ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը մտադիր է հասնել ուժային կառույցների ղեկավարների հրաժարականին։ Միաժամանակ, թերթը հավելել էր, նա դա փորձում է անել դա այլ պատգամավորների օգնությամբ։ ԶԼՄ-ն Քյարամյանի կոշտ արձագանքը կապել էր ԱԺ-ում իր ելույթի ժամանակ Դավոյանի օգնականի՝ իր հասցեին ուղղված ռեպլիկի հետ, որն ասել էր՝ «համբալի «կուռաժիտ» լինելը նայեք»:
