ԱՄՆ ընտրված նախագահ Դոնալդ Թրամփն Ազգային հետախուզության տնօրենի պաշտոնում առաջադրել է Կոնգրեսի նախկին ներկայացուցիչ Թուլսի Գաբարդի թեկնածությունը, հայտնում է CNN-ը։
2017-ին, երբ Գաբարդը Կոնգրեսի ներկայացուցիչ էր, ամերիկացի օրենսդիրների հետ այցելել էր Հայաստան և Արցախ:
«Ես գիտեմ, որ Թուլսին ԱՄՆ հետախուզական համայնքին կբերի այն անվախ ոգին, որը սահմանել է նրա վաստակաշատ կարիերան՝ պաշտպանելով մեր սահմանադրական իրավունքները և ապահովելով խաղաղություն ուժի միջոցով»,- ասել է Թրամփը:
Գաբարդն Արցախ էր այցելել 2017 թվականի սեպտեմբերի 20-ին՝ ԱՄՆ Ներկայացուցիչների պալատի անդամներ Ջեքի Սփիերի, Աննա Էշուի, Ֆրենկ Փալոնեի, Դեյվիդ Վալադաոյի և Ջեյմս Սենսենբրենների հետ միասին։
«Բոլոր այցելությունների և հանդիպումների ժամանակ իսկապես դրսևորվեց հայ ժողովրդի ուժն ու տոկունությունը»,- ուղևորությունից հետո ասել էր նա։
Հայաստանում Կոնգրեսի պատվիրակությունը հանդիպել էր պաշտոնյաների, քաղաքացիական հասարակության և ոլորտի առաջնորդների հետ՝ ուսումնասիրելով Միացյալ Նահանգների և Հայաստանի միջև քաղաքական և տնտեսական կապերի ընդլայնման հնարավորությունները: Մեկնաբանելով Շուշիի՝ Արցախի արհեստագործական ուսումնարան կատարած իր այցը և Ստեփանակերտում արցախցի քաղաքական գործիչների և պատգամավորների հետ հանդիպումները՝ Գաբարդն ընդգծել էր Արցախի իշխանությունների՝ պայծառ ապագա ստեղծելու ցանկությունը։
2020 թվականին Գաբարդը Թուրքիային մեղադրել էր Լեռնային Ղարաբաղում պատերազմը հրահրելու և խրախուսելու մեջ։ 2020 թվականի հոկտեմբերին նա ստորագրել էր նախկին Պետքարտուղար Մայք Պոմպեոյին ուղղված նամակը, որում մտահոգություն էր հայտնել Արցախի դեմ ադրբեջանական ագրեսիայի վերսկսման և Հայաստանի հետ հնարավոր հակամարտության վերաբերյալ։
«Միացյալ Նահանգներն Ադրբեջանին պետք է անհապաղ կոչ անի դադարեցնել հարձակումները, իսկ Թուրքիային՝ իր ներգրավվածությունը՝ ինչպես ուղղակիորեն իր ռազմական ուժերի կիրառմամբ, այնպես էլ անուղղակիորեն՝ ուղարկելով Ալ-Քաիդայի հետ կապված ուժեր՝ ոչնչացնելու Լեռնային Ղարաբաղի հայ բնակչությանը. մարտավարություն, որը Թուրքիան կիրառել է սիրիացի քրդերի դեմ»,- նշել է նա։
Նամակում Գաբարդն ընդգծել էր, որ այցելել է Լեռնային Ղարաբաղ և անձամբ է լսել հայերի ցանկության մասին՝ պահպանել հրադադարը և համագործակցել միջազգային կողմերի հետ՝ կայուն խաղաղության համաձայնագրի հասնելու համար։
2019 թվականին, որպես ԱՄՆ նախագահի թեկնածու, Գաբարդն ԱՄՆ մի քանի այլ սենատորների և ԱՄՆ Ներկայացուցիչների պալատի անդամների հետ համահովանավորել էր Հայոց ցեղասպանությունը ճանաչող բանաձև՝ հաստատելով Հայոց ցեղասպանության պաշտոնական ճանաչումը և հավերժ հիշատակը:
Ամերիկայի Հայ դատի հանձնախումբը (ANCA) ողջունել է Թրամփի կողմից Գաբարդի թեկնածությունն ԱՄՆ Ազգային հետախուզական ծառայության ղեկավարի պաշտոնում։
Գաբարդը Միացյալ Նահանգների բանակի պահեստային սպա է: Նա 2013-2021 թվականներին ծառայել է որպես Հավայան նահանգի Ներկայացուցիչների պալատի անդամ: Այնուհետև ներկայացրել է Դեմոկրատական կուսակցությունը։ 2022 թվականին Գաբարդը լքել է կուսակցությունը և իրեն հռչակել անկախ քաղաքական գործիչ, իսկ 2024 թվականին նա միացել է հանրապետականներին։
Քաղտեխնոլոգ Արմեն Բադալյանն Armenia Today-ին մեկնաբանել էր Թրամփի ընտրության հնարավոր ազդեցությունը տարածաշրջանի, Երևանի և Բաքվի միջև հարաբերությունների կարգավորման գործընթացի վրա։
