Մոսկվան Հայաստանի կողմից ՄՔԴ-ի Հռոմի ստատուտի վավերացումը ոչ ճիշտ որոշում է համարում երկկողմ հարաբերությունների համար, ասել է ՌԴ նախագահի մամուլի քարտուղար Դմիտրի Պեսկովը։ Նա հայտնել է, որ Մոսկվան նոր հարցեր ունի Հայաստանի իշխանություններին:
«Մենք լրացուցիչ հարցեր կունենանք Հայաստանի ներկայիս ղեկավարությանը։ Դրանք նախապես հանձնվել էին հայկական կողմին»,- ասել է նա և նշեց, որ Հայաստանը շարունակելու է մնալ Ռուսաստանի գործընկերը։
Հայաստանի խորհրդարանը հոկտեմբերի 3-ին վավերացրել է Միջազգային քրեական դատարանի Հռոմի կանոնադրությունը։ Միջազգային իրավական հարցերով Հայաստանի ներկայացուցիչ Եղիշե Կիրակոսյանն ասել է, որ փաստաթուղթը խորհրդարանի կողմից վավերացնելուց հետո այն պետք է ստորագրվի երկրի նախագահի կողմից և ուժի մեջ մտնի ներպետական ընթացակարգերի ավարտից 60 օր հետո։ Այսօր ավելի վաղ ՌԴ Դաշնային խորհրդի փոխխոսնակ Յուրի Վորոբյովը կանոնադրության վավերացումն անվանել էր «ոչ բարեկամական քայլ» Ռուսաստանի նախագահ Վլադիմիր Պուտինի նկատմամբ։
Սեպտեմբերի 28-ին Կիրակոսյանն ասել էր, որ Հայաստանն առաջարկել է Ռուսաստանին ստորագրել համաձայնագիր՝ հիմնվելով 98-րդ հոդվածի 2-րդ մասի վրա՝ կանոնադրության շուրջ տարաձայնությունները լուծելու համար։ Նրա խոսքով, երկար ամիսներ շարունակ բանակցություններ են վարվել ռուս գործընկերների հետ՝ կապված Հայաստանի մտադրությունների հետ՝ վավերացնել կանոնադրությունը։
