ՀԱՊԿ-ից ականկալում ենք մեր տարածքները վերականգնելու «ճանապարհային քարտեզ». վարչապետ

Մենք առաջիկայում նախաձեռնում ենք ՀԱՊԿ կոլեկտիվ անվտանգության խորհրդի արտահերթ նիստ, որպեսզի քննարկենք ՀԱՊԿ առաքելության զեկույցը, ես հուս ունեմ, որ հնարավորինս արագ տեղի կունենա այդ նիստը։ Այս մասին ԱԺ-Կառավարություն հարցուպատախսանի ժամանակ հայտարարեց վարչապետ Նիկոլ Փաշինյանը։

Նա նշեց, որ այդ նիստից մի քանի ակնկալիք կա. «Առաջին՝ ՀԱՊԿ-ը հստակ քաղաքական գնահատական կտա տեղի ունեցածին և երկրորդ՝ կընդունի Հայաստանի տարածքային ամբողջականությունը վերականգնելու վերաբերյալ «ճանապարհային քարտեզը»,-հայտարարեց նա՝ հավելելով, որ սա ոչ միայն կառավարության, այլև հայ ժողովրդի ակնկալիքն է և բազմաթիվ հարցեր, որոնք բարձրացվել են հանրության կողմից, կստանան իրենց պատասխանները։

Նշենք, որ ԱԳ նախարար Արարատ Միրզոյանի հետ հանդիպմանը ՌԴ ԱԳ նախարար  Սերգեյ Լավրովը հայտարարել է, որ քննարկվում է Հավաքական անվտանգության պայմանագրի կազմակերպության դիտորդների ներգրավման հնարավորությունը՝ նպաստավոր պայմաններ ստեղծելու Ադրբեջանի, Հայաստանի և Ռուսաստանի ղեկավարների միջև պայմանավորվածությունների իրականացման համար, մասնավորապես՝ հայ-ադրբեջանական սահմանի սահմանազատման և, ընդհանրապես, Բաքվի և Երևանի միջև հարաբերությունների կարգավորման, այդ թվում՝ համապատասխան համաձայնագրի ստորագրման համար։