Չինաստանը և Ադրբեջանն Աստանայում համատեղ հռչակագիր են ընդունել երկու երկրների միջև ռազմավարական գործընկերության վերաբերյալ, հայտնում են ադրբեջանական լրատվամիջոցները։
Շանհայի համագործակցության կազմակերպության (ՇՀԿ) գագաթնաժողովի շրջանակներում Չինաստանի նախագահ Սի Ցզինպինը հանդիպել է Ադրբեջանի նախագահ Իլհամ Ալիևի հետ։
Ըստ ադրբեջանական լրատվամիջոցների մեջբերած հռչակագրի տեքստի՝ Բաքուն վճռականորեն պաշտպանում է «Մեկ Չինաստան» սկզբունքը։ Չինական կողմը «խստորեն աջակցում է ադրբեջանական կողմի առաջարկած խաղաղության օրակարգին և ոչ արդյունավետ է համարում աշխարհաքաղաքական ինտրիգները, որոնք ուղղված են առճակատման պահպանմանը»։
Նշվում է, որ երկու երկրներն էլ «ունեն ուժեղ տնտեսական փոխլրացում և հսկայական ներուժ՝ արդյունաբերության և ներդրումների ոլորտում համագործակցությունը մեծացնելու համար»։
Պեկինը և Բաքուն պատրաստակամություն են հայտնել խորացնել գործնական համագործակցությունը «Մեկ գոտի և մեկ ճանապարհ» նախագծի շրջանակներում և արագացնել միջազգային մուլտիմոդալ տրանսպորտի զարգացման մասին համաձայնագրի ստորագրման գործընթացը։
Նշվում է, որ կողմերը կաջակցեն «միմյանց ջանքերին՝ իրենց տարածքներով անցնող միջազգային տրանսպորտային միջանցքների անվտանգության ապահովման և անխափան գործունեության ապահովման հարցերը լուծելու հարցում»։ Հռչակագրի շրջանակներում Պեկինն իր պատրաստակամությունն է հայտնել ակտիվորեն մասնակցել Անդրկասպյան միջազգային տրանսպորտային միջանցքի («Միջին միջանցք») կառուցմանն ու շահագործմանը, ինչպես նաև ավելի սերտորեն աշխատել Ադրբեջանի և երթուղու մյուս երկրների հետ՝ խթանելու Չինաստան-Եվրոպա գնացքների անխափան շահագործումը և արագացված զարգացումը։
Նշվում է, որ Չինաստանն աջակցում է ՇՀԿ-ում Ադրբեջանի իրավական կարգավիճակի բարձրացմանը, ինչպես նաև ողջունում է Բաքվի մասնակցությունը ԲՐԻԿՍ համագործակցությանը։
