Լեռնային Ղարաբաղի հակամարտության կարգավորման ողջ ընթացքում առաջին անգամ ԵԱՀԿ Մինսկի խմբի գործընկերները պատրաստ չեն կառուցողական աշխատել։ Այս մասին Armenia Today-ի թղթակցի հետ զրույցում ասել է Ռուսաստանի գիտությունների ակադեմիայի հետխորհրդային հետազոտությունների կենտրոնի ավագ գիտաշխատող, պատմական գիտությունների թեկնածու Ստանիսլավ Պրիտչինը։
«Լեռնային Ղարաբաղի հակամարտության կարգավորման ողջ ընթացքում մենք այժմ առաջին անգամ տեսնում ենք, որ ԵԱՀԿ Մինսկի խմբի գործընկերները (Ռուսաստան, Ֆրանսիա, ԱՄՆ) պատրաստ չեն կառուցողական աշխատել, չնայած այն բանին, որ դա ընդհանուր առմամբ իրենց ընդհանուր շահերից է բխում», – ասել է նա: Փորձագետը նշել է, որ չնայած աշխարհի այլ մասերում տարբեր վայրիվերումներին և մեդիատորների միջև հարաբերություններում առկա բարդություններին, նախկինում միշտ հաջողվել է կառուցողական տրամադրվածություն պահպանել կարգավորման նկատմամբ և փորձել դրական կերպով առաջ տանել օրակարգը:
Պրիտչինի խոսքով՝ դա կապված է ոչ միայն ԵԱՀԿ Մինսկի խմբի անդամ երկրների միջպետական հարաբերությունների հետ, այլև այդ ինստիտուցիոնալ մարմնի ազդեցության ընդհանուր նվազման հետ, որը փաստացի ինքնամեկուսացել է երկրորդ ղարաբաղյան պատերազմից ի վեր։ Նա ընդգծել է, որ բացի ինչ-որ հայտարարություններից, փաստորեն, լուրջ փորձեր չեն ձեռնարկվել հենց Մինսկի խմբի կարգավորման շրջանակներում, և բանակցություններում հիմնական շեշտը դրվել է եռակողմ ձևաչափի վրա՝ Ռուսաստանի, Հայաստանի և Ադրբեջանի մասնակցությամբ:
Մեկնաբանելով ԵԱՀԿ Մինսկի խմբի ֆրանսիացի համանախագահի երեկվա այցը Երևան՝ Պրիտչինը նշել է, որ Ֆրանսիան փորձում է ակտիվ դեր խաղալ ղարաբաղյան հակամարտության կարգավորման գործում և, ըստ էության, փորձում է իր դիվանագիտության հաշվին տարածաշրջանում պահպանել Մինսկի խմբի ձևաչափը՝ ինչ-որ կերպ պահպանել կարգավորման առանցքային բանակցողներից մեկի դիրքորոշումը:
«Իրականում մենք տեսնում ենք, որ այցը կազմակերպվել է առանց Մինսկի խմբի մյուս համանախագահների մասնակցության, ինչը, ըստ էության, ցույց է տալիս, որ այսօր նույնիսկ համանախագահների համատեղ այցը քիչ հավանական է և դժվար կազմակերպելի։ Այնպես որ, մենք տեսնում ենք, որ խաղացողներից ինչ-որ մեկն ընդունում է, որ փաստացի իրավիճակը անհույս է, իսկ ինչ-որ մեկը փորձում է ձևացնել, որ հակամարտության կարգավորումն այս ձևաչափով դեռևս հնարավոր է», – ասել է փորձագետը:
