Այսօր լեգենդար Կոմանդոսը, հայ ռազմական գործիչ, Հայաստանի ազգային հերոս, Արցախի հերոս, գեներալ-մայոր Արկադի Տեր-Թադևոսյանը կդառնար 84 տարեկան։
Տեր-Թադևոսյանը ծնվել է 1939թ. մայիսի 22-ին։ Թբիլիսիում ավարտել է միջնակարգ դպրոցը։ Ավարտելով Բաքվի Համակցված սպառազինության հրամանատարական դպրոցը, այնուհետև Լենինգրադի Տրանսպորտի և նյութատեխնիկական ապահովման ռազմական ակադեմիան՝ Տեր-Թադևոսյանը ծառայել է Աֆղանստանում, Գերմանիայում, Չեխոսլովակիայում, Բելառուսում, իսկ 1987 թվականից՝ Հայաստանում։
1991 թվականի հուլիսի 13-ին գնդապետ Տեր-Թադևոսյանը և փոխգնդապետ Ֆելիքս Գզողյանը մեկնել են Արցախ՝ զինվորականներին մարտարվեստ սովորեցնելու։ Աֆղանստանում նրան անվանում էին «Լեռնային աղվես»՝ լեռնային պայմաններում կռվելու իր հմտության համար։ Արցախում պատրաստության հատուկ տեխնիկայի համար ստացել է «Կոմանդոս» մականունը։ 1992-ին Կոմանդոսը մշակել և իրականացրել է Շուշիի ազատագրման փայլուն գործողությունը (մայիսի 8-9):
Տեր-Թադևոսյանի կողմից ամենախիստ գաղտնիությամբ մշակված Շուշիի բերդի վրա գրոհի ծրագիրը («Հարսանիք լեռներում» գործողության ծածկանունը), նրա համար դարձավ առաջին լայնածավալ օպերացիան և իր զինվորական կենսագրության թագադրումը։ 1992 թվականի մայիսի 9-ին հայկական ստորաբաժանումները գրավեցին Ղարաբաղում գտնվող թշնամու գլխավոր միջնաբերդը։ Ռազմավար Տեր-Թադևոսյանի տաղանդի և հայ զինյալների խիզախության շնորհիվ «Հարսանիք լեռներում» օպերացիան իրականացվեց նվազագույն կորուստներով։
1992 թվականի մայիսի 25-ին Կոմանդոսին շնորհվել է գեներալ-մայորի կոչում։ Տեր-Թադևոսյանն անգնահատելի ներդրում է ունեցել նաև Արցախի պաշտպանության բանակի ստեղծման գործում։ Իր հարցազրույցներից մեկում Կոմանդոսն ասել է, որ բավականին հասուն տարիքում է տեղափոխվել Հայաստան և անմիջապես հասկացել է, որ այստեղ ամեն ինչ հարազատ է․ «Այստեղ դու քոնն ես, քոնը քո յուրայինների մեջ… Դու զգում ես, որ քո ընտանիքի և երեխայի համար ամեն ինչ ստեղծված է այստեղ: Հայաստանն այն վայրն է, որտեղ ես ապրում և ստեղծագործում եմ։ Ես սիրում եմ հայկական հողի յուրաքանչյուր կտոր…»:
Կոմանդոսը Շուշիի ազատագրման գործում իր դերը վերհիշում է այսպես. «Երբ ասում են՝ Շուշին վերցրեցիք, դա էլ է սխալ։ Մեկը դաշտում մարտիկ չէ։ Ամենուր կոլեկտիվ կա։ Պրուսական համակարգում է, որ առաջին տեղում ղեկավարությունն է: Բայց իրականում ամեն ինչ որոշում է զինվորը։ Ահա ես այստեղ կախված նկար ունեմ՝ գեներալի և զինվորի հագուստներ։ Ի՞նչն է գերակշռում: Ճիշտ է, երկրորդը։ Իսկ հարձակման մեջ գլխավոր դերը կատարել են կամավորները, ովքեր գիտակցաբար զոհաբերել են իրենց»։
Տեր-Թադևոսյանը մահացել է 2021 թվականի մարտի 31-ին՝ 82 տարեկան հասակում։
