Արցախի նախագահ Արայիկ Հարությունյանը Ռուսաստանի նախագահ Վլադիմիր Պուտինին կոչ է արել միավորել ռազմավարական շահերն ու ջանքերը՝ Հարավային Կովկասում անվտանգությունն ապահովելու համար։
«Այժմ, երբ Ադրբեջանն ամեն ինչ անում է փլուզելու Արցախի և տարածաշրջանի անվտանգության փխրուն ճարտարապետությունը և ՌԴ երաշխիքները՝ Արցախի շարունակվող շրջափակման ու սպառնալիքների միջոցով, մենք վստահ ենք, որ մեր ռազմավարական շահերի ներդաշնակեցման և ջանքերի համատեղման միջոցով մեր երկու ժողովուրդներին կհաջողի ապահովել տարածաշրջանային կայուն ու արժանապատիվ միջավայր բոլոր կողմերի համար»,- ասված է հաղորդագրության մեջ:
Ռուսաստանի օրվա առթիվ Արցախի նախագահ Արայիկ Հարությունյանի ուղերձում՝ ուղղված ՌԴ նախագահ Վլադիմիր Պուտինին, նշվում է, որ հայ և ռուս ժողովուրդների դարավոր բարեկամությունը, ինչպես նաև հայոց ու ռուսական պետականությունների ռազմավարական և դաշնակցային հարաբերությունները ձևավորել են նշանակալի պատմություն և մեծ ներուժ հետագա զարգացման համար։
Հարությունյանը նշել է, որ հայ-ռուսական հարաբերություններում իր ուրույն տեղն է ունեցել և ունի նաև Արցախը՝ որպես Հարավային Կովկասի կարևոր սուբյեկտներից մեկը:
«Արցախցիները բարձր ենք գնահատում Ռուսաստանի և անձամբ Ձեր դերակատարությունը 2020թ. արյունահեղության կասեցման և Արցախում հետագա նոր լայնածավալ ագրեսիաների ու ողբերգությունների կանխման հարցում: Արցախի ժողովուրդը սրտաբաց է ընդունել ռուս խաղաղապահների առաքելությունը՝ նրանց մեջ տեսնելով սեփական հայրենիքում ազատ ու արժանապատիվ ապրելու ամուր երաշխիքներ»,- նշել է Հարությունյանը:
