Ռուսաստանի Կարմիր Խաչը ռուսական արտադրանք է հասցրել Արցախ, հայտնում է Արցախի սոցիալական զարգացման և միգրացիայի նախարարության մամուլի ծառայությունը։
Մարդասիրական օգնություն ունեցող բեռնատարի մեջ եղել են 1000 պարենային հավաքածու, 270 կոմպլեկտ անկողնային սպիտակեղեն, 200 հիգիենայի հավաքածու և 192 հավաքածու երեխաների համար։
Այսօր ավելի վաղ Ստեփանակերտի թույլտվությամբ Ասկերանի տարածքով Ռուսական Կարմիր Խաչի մարդասիրական բեռները հասցվել են Արցախ։
Սեպտեմբերի 9-ին Արցախի իշխանությունները թույլ են տվել Ռուսաստանի կողմից Ասկերանի տարածքով հումանիտար օգնության ներմուծումը հանրապետություն՝ խաղաղապահների և ԿԽՄԿ-ի կողմից Լաչինի միջանցքով մարդասիրական բեռների տեղափոխման վերսկսման պայմանով։
Սեպտեմբերի 10-ին ադրբեջանական լրատվամիջոցները հայտնել էին, որ Ռուսաստանի կողմից Լեռնային Ղարաբաղ ուղարկված բեռնատարի անցումը «ուշանում է»։ Բացի այդ, հայտնի էր դարձել, որ արցախցիները բողոքի ակցիա էին իրականացնում Ռուսաստանից Աղդամի տարածքով բեռների ներկրման դեմ։ Ավելի ուշ Արցախի խորհրդարանի ընդդիմադիր «Արդարություն» խմբակցության անդամ Մետաքսե Հակոբյանը Armenia Today-ին ասել է Ադրբեջանի կողմից Ասկերանով Ստեփանակերտ ռուսական մարդասիրական բեռների մատակարարման պայմանագրի չեղարկման մասին։
