Apple-ը համաձայնել է վճարել 95 մլն դոլար՝ վիրտուալ օգնական Siri-ի հավելվածի կողմից գաղտնալսման դեմ բողոքող օգտատերերի հայցը լուծելու համար, հայտնում է The Guardian-ը։
iPhone օգտագործողները դժգոհում էին, որ Apple-ը պարբերաբար ձայնագրում էր իրենց անձնական խոսակցությունները, երբ նրանք ակամա ակտիվացնում էին Siri-ն, և այդ խոսակցությունները հայտնում երրորդ կողմին, ինչպիսիք են գովազդատուները:
Դատական հայցով պնդում են, որ խախտումները տևել են 2014 թվականի սեպտեմբերի 17-ից մինչև 2024 թվականի դեկտեմբերի 31-ը: Դա սկսվել է այն ժամանակ, երբ Siri-ն ընդգրկել է «Hey, Siri» գործառույթը, որն, ըստ հայցի, հանգեցրել է չարտոնված ձայնագրությունների:
Երկու հայցվորներ հայտարարել են, որ Air Jordan սպորտային կոշիկների և Olive Garden ռեստորանների մասին իրենց հիշատակումները գովազդ են առաջարկել այդ ապրանքների համար: Հայցվորները պնդում են, որ Apple-ը համաձայնություն չի ստացել իրենց խոսակցությունները ձայնագրելու համար, և իրականում չէր կարող համաձայնություն ստանալ հայցվորներից մեկից, քանի որ ձայնագրման պահին նա անչափահաս էր:
Դատական հայցը ներկայացվել է այն բանից հետո, երբ 2019 թվականի զեկույցում պարզվել է, որ Apple-ի աշխատակիցները կարող են լսել «Hey Siri» հավելվածի կողմից գրանցված անձնական տեղեկատվությունը: Նշվում է, որ գրառումները ներառում էին բժշկական տեղեկատվություն, ապօրինի գործարքներ և զույգերի «ինտիմ հանդիպումներ»:
Apple-ը հերքել է որևէ ապօրինություն: Սակայն զեկույցի հրապարակումից և ներքին հետաքննությունից հետո ընկերությունը ներողություն է խնդրել և խոստովանել, որ չի կարողացել ամբողջությամբ համապատասխանել իր որդեգրած բարձր չափանիշներին:
