Ամերիկյան ռեալիթի շոուի հայազգի աստղ Քիմ Քարդաշյանը հայտարարել է «Քիմ Քարդաշյան. Հոլիվուդ» խաղի փակման մասին, հայտնել է BBC-ն։ «Ես ի սրտե երախտապարտ եմ բոլոր նրանց, ովքեր վերջին 10 տարիների ընթացքում սիրել և խաղացել են «Քիմ Քարդաշյան. Հոլիվուդ»,- մեջբերում է գործակալությունը Քիմի խոսքերը։ Նա հավելել է, որ խաղն իր համար «մեծ նշանակություն ուներ», բայց «ժամանակն է կենտրոնացնել այդ էներգիան այլ հետաքրքրությունների վրա»:
Քարդաշյանը նաև իր երախտագիտությունն է հայտնել Glu-ի թիմին և նվիրված խաղացողներին, ովքեր աջակցել են խաղին վերջին տասնամյակում: «Ես միշտ ոգեշնչվելու եմ այս համայնքից, որը մենք միասին ենք ստեղծել»,- եզրափակել է հեռուստաաստղը։
Խաղը հանվել է Apple և Android հավելվածների խանութներից։ Այնուամենայնիվ, խաղացողները կարող են շարունակել օգտագործել խաղի հնարավորությունները մինչև ապրիլի 8-ը: Քարդաշյան խաղը 2014 թվականին թողարկվելուց մեկ ամիս անց 160 միլիոն դոլարի եկամուտ է բերել: Խաղում ընդգրկված էին նաև ռեալիթի աստղի ընտանիքի անդամները, այդ թվում՝ Քլոե Քարդաշյանը, Քորթնի Քարդաշյանը և Քրիս Ջենները։
