Երևանի քաղաքապետարանի մամուլի քարտուղար Հայկ Կոստանյանը հայտնել է հունվարի 1-ից հունիսի 30-ն ընկած ժամանակահատվածում «Երևան ավտոբուս» ՓԲԸ-ի 167 վարորդների աշխատանքից ազատման մասին՝ քաղաքացիների հանդեպ ոչ պատշաճ վերաբերմունքի պատճառով։
«Ազատման պատճառներից են քաղաքացիների հանդեպ ոչ պատշաճ վերաբերմունքը, երթևեկության ընթացքում թույլ տված պարբերական խախտումները, ինչպես նաև ծառայողական այլ խնդիրներ»,- գրել է նա Facebook-ում։
Մայիսի 22-ին «Երևան ավտոբուս» ՓԲԸ-ի վարորդները և աշխատակիցները գործադուլ էին հայտարարել՝ ի նշան բողոքի կառույցի ղեկավարի կողմից իրականացվող «չհիմնավորված աշխատանքից ազատումների» դեմ։ Երևանի քաղաքապետարանի մամուլի քարտուղար Հայկ Կոստանյանն ասել էր, որ քաղաքապետարանը վարորդների գործադուլը համարում է «որպես դիվերսիա տրանսպորտի ոլորտում իրականացվող բարեփոխումների դեմ»։
Նույն օրը երեկոյան Ավինյանը հանդիպել էր գործադուլ անող վարորդների և «Երևան ավտոբուս» ՓԲԸ-ի աշխատակիցների հետ։ Նա վարորդներին կոչ էր արել գնալ աշխատանքի՝ խոստանալով հետո հանդիպել նրանց, ինչպես նաև աշխատանքից ազատված ընկերության գլխավոր ինժեների՝ Մանուկյանի հետ։ Քաղաքապետը խոստացել էր վերանայել նաև ընկերությունում իրականացված այլ կրճատումները։
