Վայոց ձորի մարզի Արենի գյուղում մեկնարկել է Գինու 16-րդ փառատոնը, որն ավանդաբար անցկացվում է հոկտեմբերի առաջին շաբաթվա ընթացքում։ Այս տարի «Ազգերը հանուն խաղաղության» կարգախոսի ներքո մասնակցում են Հայաստանի ազգային փոքրամասնությունները ներկայացնող արտադրողներ։ Հյուրերին տրամադրվել են գինու համտես, ավանդական ուտեստներ, հնարավորույուն սուզվելու հայկական ազգային երաժշտության ու պարի մթնոլորտում:
«Արենի գինու փառատոնն ամփոփում է հայկական գինեգործության դարավոր արմատները և հանդիսանում է մշակույթի անբաժանելի մասը: Խաղողի աճեցումից մինչև գինեգործության բարդություններ՝ այս փառատոնը հիանալի հնարավորություն է ծանոթանալու գինու պատմությանը և այն մարդկանց, ովքեր իրենց կյանքը նվիրել են այս արվեստին»,- ասում են կազմակերպիչները։
Մինչ փառատոնի բացման արարողությունն ազգային ավանդական երաժշտության ներքո հանդես են եկել մանկապատանեկան համույթները։ Ելույթ են ունեցել նաև երաժիշտներ Բելառուսից և Ուկրաինայից։ Արենի գինու փառատոնը մեկնարկել է ազգագրական համույթների ելույթներով, որոնք ևս մեկ անգամ ստիպել են վերագնահատել հազարամյա մշակույթի կարևորությունը։ Միջոցառման պաշտոնական բացումը նշանավորվել է խաղողի մամլման արարողությամբ, որից հետո սկսվել է շուրջպար։
Փառատոնի շրջանակներում ցուցադրվում են գյուղատնտեսական ապրանքների (չրեր, գինիներ, մեղր, հայկական ավանդական գաթա): Հյուրերը կարող են նաև համտեսել տեղական արտադրողների գինիները: Արցախցի արտադրողների արտադրանքը ներկայացված է 10 տաղավարում։
Փառատոնի ուշադրության կենտրոնում գինեգործներն են: Մասնակիցները կարողացել են ծանոթանալ հայկական և տնական գինիների լայն ընտրանու հետ, համտեսել դրանք և ձեռք բերել ամենաընտիր տեսակները:
Էկոնոմիկայի նախարարությունն աշխատում է Արենի գինու փառատոնի նման փառատոների մասսայականացման ուղղությամբ՝ հայկական գինու ապրանքանիշն աշխարհում ավելի ճանաչելի դարձնելու համար, Armenia Today-ին հայտնել է Էկոնոմիկայի նախարար Գևորգ Պապոյանը։ Էկոնոմիկայի նախարարության ղեկավարի խոսքով՝ փառատոնի այցելուների թիվն ավելացնելու համար իշխանությունները պետք է համակողմանի աշխատեն ենթակառուցվածքների բարելավման, հայկական գինու ապրանքանիշի առաջխաղացման և զբոսաշրջիկների հոսքի ավելացման ուղղությամբ։ Նա հավելել է, որ նման փառատոններն ուղղված են Հայաստանի տարածքային զարգացմանը և հույս հայտնել, որ ամեն տարի այցելուների թիվը կավելանա և կհասնի 100 հազարի։
Հայաստանի եզդիական, քրդական, ռուսական, ասորական, ուկրաինական, բելառուսական և հունական համայնքների ներկայացուցիչները ներկայացրել են ավանդական խմիչքներ և իրենց ազգային պարերը։ Մինչև օրվա վերջ Արենիում ելույթ կունենան նաև արցախյան համույթները, YereOne նախագիծը և Gata Band-ը։
Փառատոնի մասնակիցները հնարավորություն են ունեցել այցելելու Ելփին, Ագարակաձոր, Չիվա, Գնիշիկ, Արփի գյուղեր, ինչպես նաև Արփա գետի ափին գտնվող Արենի քարանձավ, որտեղ հայտնաբերվել են աշխարհի ամենահին կոշիկները և աշխարհի առաջին գինեգործարանը։
«Գինեգործությունը ոչ միայն տեխնիկական գործընթաց է, այլև ազգային հարստություն, որը փոխանցվում է սերնդեսերունդ՝ համատեղելով ավանդույթները, մշակութային արժեքները և բնության շնորհները։ Արենիում այս ամենը վերածվում է յուրահատուկ փորձի, որը նշում է գինեգործության արվեստը՝ միավորելով մարդկանց ու պատմությունները»,- եզրափակել են կազմակերպիչները։
Փառատոնի մուտքն անվճար է, կարելի է ձեռք բերել նաև մեկ բրենդային գինի՝ 5000 դրամով, որը հնարավորություն է տալիս համտեսել տեղական արտադրողների գինիները։