Tesla и SpaceX ընկերությունների հիմնադիր Իլոն Մասկի Starlink գլոբալ արբանյակային համակարգը կապահովի Հայաստանի ինտերնետ կապը իր հարևանների, մասնավորապես Ադրբեջանի հետ հակամարտությունների ժամանակ, գրում է Forbes-ը։
Հրատարակությունը հիշեցրել է, որ հինգ տարի առաջ ադրբեջանցի գործարար Նասիբ Հասանովի NEQSOL հոլդինգը գնել է Caucasus Online, որին է պատկանում 1200 կիլոմետրանոց Կովկասյան մալուխային համակարգը, որն անցնում է Սև ծովի հատակով և միացնում տարածաշրջանը Եվրոպային։
Նշվում է, որ սա անհանգստություն է առաջացրել Հայաստանի թվային ենթակառուցվածքի վրա Ադրբեջանի ազդեցության վերաբերյալ և Starlink-ը կարող է խաթարել այս դինամիկան:
«Starlink-ի ժամանումը, թեև տեխնոլոգիական թռիչք է, չի լուծում այս արմատացած աշխարհաքաղաքական դինամիկան: Փոխարենը, այն Հայաստանին առաջարկում է գործիք՝ բարձրացնելու իր անկախությունը, ինչպես թվային առումով, այնպես էլ տնտեսապես»,- գրում է հրատարակությունը:
Մասկը հոկտեմբերի 7-ին հայտարարել էր Հայաստանում Starlink-ի գործարկման հնարավորության մասին։ Նա ուղերձ է հղել Երևանում WCIT 2024-ի փակման արարողության ժամանակ` ընդգծելով Հայաստանում Starlink-ի և արհեստական ինտելեկտի հնարավորությունների հետ կապված ծրագրերի մեկնարկի մասին։ Դեկտեմբերի 13-ին Starlink-ը Հայաստանում գործունեության թույլտվություն և լիցենզիա էր ստացել։
Starlink-ը գլոբալ արբանյակային համակարգ է, որը տեղադրվել է SpaceX-ի կողմից՝ ապահովելու գերարագ լայնաշերտ արբանյակային ինտերնետ հասանելիություն այն վայրերում, որտեղ այն անհասանելի էր։
