Հունիսի 10-12-ը Խորվաթիայի Վարաժդին քաղաքում կայացավ օլիմպիական կարատեի 4 պաշտոնական ոճերից մեկի՝ սիտո-րյու մարզաձևի Եվրոպայի առաջնությունը։ Այս տարի Եվրոպայի առաջնությանը մասնակցել է 34 երկիր։ Այս մասին հայտնում են Հայաստանի կարատեի միության լրատվական ծառայությունից։
Առաջնությունում Հայաստանը ներկայացրել է սպորտային կարատեի աշխարհի և Եվրոպայի չեմպիոն, Հայաստանի կարատեի միության հիմնադիր Կամո Ունանյանը։
Հայ մարզիկը, մրցելով նախ անգլիացի, հետո՝ իսպանացի, սլովենացի և ռումինացի մարզիկների հետ, 4 մարտերում հաղթանակներ գրանցելով, դարձել է Եվրոպայի չեմպիոն։
«Մեկնելուց առաջ խոստացել էի, որ գնում եմ ոսկե մեդալի հետևից, ինչպես միշտ, խոստումս կատարեցի»,- ասաց Կամո Ունանյանը, ով 5-րդ անգամ է նվաճում սպորտային կարատեի Եվրոպայի չեմպիոնի տիտղոսը։
Ի դեպ, ինչպես արդեն հայտնի է, այս առաջնությունից հետո Կամո Ունանյանը Եվրոպայում մեջքի վիրահատության կենթարկվի․ «Վերջին 4 տարիների ընթացքում 3 անգամ մեջքի վիրահատություն եմ ունեցել, հուսով եմ՝ սա վերջինը կլինի»,- ասել էր Ունանյանը։
Հիշեցնենք, որ Կամոն տարիներ առաջ առաջնություններից մեկի ժամանակ մեջքի լուրջ վնասվածք էր ստացել և վերջին 4 տարիների ընթացքում պարբերաբար բուժում է ստանում տարբեր երկրներում։
Սիտո-րյուն կարատեի չորս հիմնական ոճերից մեկն է, որը ստեղծվել է Քենվա Մաբունիի կողմից (1889-1952): Դրա տեխնիկան ավելի մոտ է մարտարվեստի հին Օկինավայի ոճերին, համեմատած շոտոկան ոճի տեխնիկայի հետ:
