«Փարիզ-2024» ամառային օլիմպիական խաղերի կազմկոմիտեն ներկայացրել է մրցումների ծրագիրը, մեկնարկի ժամկետներն ու ժամերը։ Այս մասին հայտնում են ՀԱՕԿ-ից։
Առաջին ոսկե մեդալները կխաղարկվեն 2024-ի հուլիսի 27-ին։ Մարզիկները կպայքարեն ձյուդո, սուսերամարտ, հեծանվավազք, սքեյթբորդինգ, լող, ջրացատկ, ռեգբի և հրաձգություն մարզաձևերում: Օլիմպիական խաղերի եզրափակիչ օրը՝ օգոստոսի 11-ին, մեդալներ կխաղարկվեն ըմբշամարտում, աթլետիկայում (մարաթոն), ծանրամարտում, բասկետբոլում, ջրագնդակում, հեծանվավազքում, հնգամարտում և հանդբոլում:
Տոմսերի պաշտոնական վաճառքը կսկսվի 2022թ. դեկտեմբերին։ Ըստ կազմակերպիչների՝ կիրացվի ավելի քան 10 մլն տոմս։ Շուրջ մեկ միլիոնը կվաճառվի 24, գրեթե 50%-ը՝ 50 , իսկ 1/3-րդը՝ 100 եվրոյով։ Մնացած 15%-ը կառաջարկվի ավելի բարձր գնով։ Ամենաթանկ տոմսի արժեքը 950 եվրո կլինի։
Հայտարարվել է Փարիզում 2024թ. անցկացվելիք ամառային օլիմպիական խաղերի կարգախոսը. այն է՝ «Փարիզ-2024» «Ընդարձակել, հասանելի դարձնել խաղերը»։ Կարգախոսը կգործի նաև պարալիմպիկ խաղերի ժամանակ:
