Հայ առաջատար, ՊԲ շարքերն անցած ըմբիշները չեն մասնակցելու Հայաստանում անցկացվելիք «Բանակային աշխարհի առաջնության»-ը, հայտնել է ազատ ոճի ըմբշամարտի աշխարհի կրկնակի, Եվրոպայի քառակի չեմպիոն Արսեն Հարությունյանը։
Նրա խոսքով՝ օրեր առաջ իրենց տեղեկացրել են, որ չեն կարող մասնակցել առաջնությանը: «Ավելի ցավալի է, որ մեր առաջատար ըմբիշներին՝ այն մարզիկներին, ովքեր մեծ հնարավորություն ունեին չեմպիոն դառնալու, պարզապես դուրս են հանել մրցաշարի կազմից: Մեզ ոչ մի հստակ պատճառաբանություն չեն ներկայացրել, թե ինչու ենք նման որոշման առջև կանգնել։ Այս իրավիճակը մեզ համար չափազանց դժվար է՝ հոգեբանորեն և ֆիզիկապես: Այն աշխատանքը, որ կատարել ենք, այն զոհողությունները, որ կատարել ենք, մնում են անարդյունք»,- ընդգծել է Հարությունյանը:
Ըմբիշը նշել է, որ Հայաստանի թիմը վերջին ամիսների ընթացքում անդադար աշխատել է՝ պատրաստվելով կայանալիք առաջնությանը։
«Մեր թիմը մեծ ջանքեր է ներդրել՝ հասնելու լավագույն մարզավիճակին: Մենք խստորեն հետևել ենք դիետային, հաղթահարել ֆիզիկական ու հոգեբանական բարդություններ՝ մեր երկրի պատիվը բարձր պահելու նպատակով»,- Facebook-ում գրել է նա:
Հայ մարզիկը հավելել է, որ իրենք չգիտեն առաջնությանը չմասնակցելու պատճառը և խորհուրդ է տվել հստակ պատասխան իմանալու համար կապ հաստատել ՊՆ մամուլի խոսնակի հետ:
ՀՀ ՊՆ մամուլի խոսնակ Արամ Թորոսյանը Armenia Today-ին չի մեկնաբանել հայ որոշ ըմբիշների՝ առաջնությանը չմասնակցելը և կոչ արել հուզող հարցերը հնչեցնել նոյեմբերի 19-ին կայանալիք մամուլի ասուլիսի ընթացքում։
Հունահռոմեական ոճի ըմբիշ Օլիմպիական խաղերի բրոնզե մեդալակիր Մալխաս Ամոյանը ևս նշել է, որ իրենց հստակ բացատրություններ չեն տրվել։ «Մեր թիմը պատրաստ էր մասնակցելու Երևանում կայանալիք Բանակայինների աշխարհի առաջնությանը։ Սակայն անհայտ, և մեզ համար անհասկանալի պատճառներով ԲԿՄԱ-ի մեր թիմի որոշ մարզիկներ զրկվել են այդ հնարավորությունից»,- Instagram-ում գրել է Ամոյանը։
Օգոստոսի 26-ին ՀՀ ՊՆ-ն հայտնել էր, որ ՀՀ դրոշն աշխարհի ու Եվրոպայի առաջնություններում բարձր պահած, հայրենիք մեդալներով վերադարձած 10 մարզիկ համալրել է ՀՀ ԶՈւ շարքերը՝ պարտադիր ժամկետային ծառայության անցնելով մարզական վաշտում։ Նշվում էր, որ նրանք կմասնակցեն ՀՀ-ում անցկացվող Զինվորականների ըմբշամարտի աշխարհի առաջնությանը։ Բանակ զորակոչված մարզիկների թվում են աշխարհի կրկնակի չեմպիոն Արսեն Հարությունյանը, աշխարհի առաջնության բրոնզե մեդալակիրներ Վազգեն Թևանյանը և Արման Անդրեասյանը, ինչպես նաև Օլիմպիական խաղերի բրոնզե մեդալակիր Մալխաս Ամոյանը։
Օգոստոսի 29-ին ԿԳՄՍ-ն հայտնել էր, որ Զինվորականների ըմբշամարտի աշխարհի 37-րդ առաջնությունը կանցկացվի Հայաստանում։
Առաջնությունն անցկացվելու է նոյեմբերի 20-22-ը Երեւանի Կարեն Դեմիրճյանի անվան մարզահամերգային, որին մասնակցելու նպատակով Հայաստան է ժամանել 2 տասնյակից ավելի պետության շուրջ 400 ներկայացուցիչ:
