Ռուսաստանի զինված ուժերը բանակցություններից հրաժարվելուց հետո հրաման են ստացել զարգացնել հարձակումը բոլոր ուղղություններով, հայտնել է ՌԴ Պաշտպանության նախարարության պաշտոնական ներկայացուցիչ Իգոր Կոնաշենկովը, փոխանցում է ТАСС-ը:
Նրա խոսքով` Ռուսաստանի Դաշնության Զինված ուժերի կրակային աջակցությամբ ԴԺՀ և ԼԺՀ զորքերի խմբավորումները զարգացնում են Ուկրաինայի զինված ուժերի դիրքերի վրա հարձակման հաջողությունը: Միևնույն ժամանակ ՉԺՀ զինված ուժերի ստորաբաժանումները մարտերով շարունակում են հարձակումը Ռուբեժնոյե բնակավայրի ուղղությամբ:
ԼԺՀ-ի զորքերը գործողության սկսվելուց ի վեր անցել են մինչև 46 կիլոմետր խորության վրա և հսկողության տակ են վերցրել Սչաստիե և Մուրատովո բնակավայրերը: ԴԺՀ զորքերի խմբավորումն առաջ է անցել ևս 10 կմ և տիրացել Ստարոգնատովկա, Օկտյաբրսկայա և Պավլոպոլ բնակավայրերին:
Փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր, որ որոշում է կայացրել Ուկրաինայի ապառազմականացման հատուկ ռազմական գործողության մասին: Ռուսաստանցիներին ուղղված հեռուստաուղերձում նա հայտարարել է, որ հանգամանքները «մեզանից պահանջում են վճռական և անհապաղ գործողություններ, Դոնբասի ժողովրդական հանրապետությունները դիմել են Ռուսաստանին՝ օգնության խնդրանքով»:
Ուկրաինայի նախագահ Վլադիմիր Զելենսկին Ռուսաստանին մեղադրել է երկրի ռազմական ենթակառուցվածքների վրա հարձակվելու մեջ և երկրի ամբողջ տարածքում ռազմական դրություն է մտցրել՝ խզելով դիվանագիտական հարաբերությունները Ռուսաստանի հետ:
Փետրվարի 25-ին Զելենսկին ՌԴ նախագահ Վլադիմիր Պուտինին առաջարկել է բանակցություններ վարել։ Նույն օրը Պուտինը ՉԺՀ-ի նախագահ Սի Ցզինպինի հետ զրույցում հայտարարել է, որ Ռուսաստանը պատրաստ է Ուկրաինայի հետ բարձր մակարդակի բանակցություններ վարել: Ուկրաինայի նախագահի մամուլի քարտուղար Սերգեյ Նիկիֆորովն էլ հայտարարել է, որ Ուկրաինան պատրաստ է բանակցությունների և կողմերը խորհրդակցում են բանակցությունների անցկացման վայրի և ժամանակի վերաբերյալ:
