Ջոնի Դեփը վաճառել է իր նկարած նկարների նոր շարքը՝ 4,5 մլն ֆունտ (մոտ 406 մլն ռուբլի) ընդհանուր գումարով: Այս մասին հայտնում է «Правил жизни» պարբերականը:
Սա Դեփի «Ընկերներ և հերոսներ» նկարների արդեն երկրորդ հավաքածուն է, որն արվել է փոփ արտի ոճով: Այն ներառում է երաժիշտ Բոբ Մարլիի, գրող Հանթեր Թոմփսոնի, դերասաններ Հիթ Լեջերի և Ռիվեր Ֆենիքսի դիմանկարները:
Լոնդոնի Castle Fine Art Gallery – ն ընդամենը հինգ օրվա ընթացքում վաճառել է Դեփի մի քանի հարյուր նկարներ՝ չորս հայտնիների պատկերով: Յուրաքանչյուր նմուշ արժեցել է 4,5 հազար ֆունտ, իսկ չորս դիմանկարներից բաղկացած հավաքածուները վաճառվել են 17,5 հազար ֆունտով։
Daily Mail-ի գնահատականներով՝ վերջին յոթ ամիսների ընթացքում Դեփն իր նկարչությունից վաստակել է ավելի քան 8 մլն ֆունտ (721,6 մլն ռուբլի): «Կարիբյան ծովի ծովահենների» աստղը լրագրողներին ասել է, որ իրեն շատ է հուզել իր արվեստի նկատմամբ մարդկանց հետաքրքրությունը:
Հուլիսին Դեփը վաճառքի էր հանել «Ընկերներ և հերոսներ» առաջին հավաքածուն: Այն ժամանակ Հոլիվուդի և ռոք երաժշտության աստղերի դիմանկարներով 780 կտավները վաճառվել էին մի քանի ժամում, դերասանն այդ գումարով վաստակել էր 3,6 մլն դոլար:
Ավելի վաղ արտիստը մոտ 800 հազար դոլար էր ստացել իր ընկերների և իրեն ոգեշնչող մարդկանց դիմանկարների հավաքածուի համար: Այդ միջոցները նա նվիրաբերել է բարեգործությանը։
