ԱՄՆ պետքարտուղար Էնթոնի Բլինքենն այսօր ՀՀ վարչապետ Նիկոլ Փաշինյանի հետ հեռախոսազրույցի ընթացքում կոչ է արել «կոնկրետ քայլեր» ձեռնարկել Բաքվի հետ բանակցությունների շրջանակում չկարգավորված հարցերի լուծման ուղղությամբ:
Ինչպես հաղորդել է Պետդեպարտամենտի մամուլի ծառայությունը, զրույցի ընթացքում պետքարտուղարն առաջարկել է ԱՄՆ-ի հետագա օգնությունը Ադրբեջանի հետ երկկողմ խաղաղ բանակցություններին աջակցելու համար:
«Պետքարտուղար Բլինքենը շնորհակալություն է հայտնել վարչապետ Փաշինյանին՝ խաղաղությանը Հայաստանի մշտական նվիրվածության համար և կոչ արել չլուծված մնացած հարցերի լուծումներ գտնելու ուղղությամբ կոնկրետ քայլեր ձեռնարկել», – ասված է հաղորդագրության մեջ:
Նշվում է, որ Բլինքենը «հաստատել է, որ ԱՄՆ-ն աջակցում է ուղիղ բանակցություններին և դիվանագիտությանը Հարավային Կովկասում կայուն և կայուն խաղաղության պահպանման համար, ինչպես նաև ընդգծել է, որ ռազմական լուծում գոյություն չունի»:
Ավելի վաղ ՀՀ կառավարության մամուլի ծառայությունը հայտնել էր, որ Նիկոլ Փաշինյանը մարտի 20-ին ԱՄՆ պետքարտուղար Էնթոնի Բլինքենի հետ հեռախոսազրույցի ընթացքում մատնանշել էր Բաքվի աճող ագրեսիվ հռետորաբանությունը: Բացի այդ, նա Բլինքենի հետ քննարկել է Ադրբեջանի կողմից Արցախի շրջափակման պատճառով հումանիտար ճգնաժամը, ինչպես նաև հայ-ադրբեջանական հարաբերությունների կարգավորումն ու տարածաշրջանում կոմունիկացիաների ապաշրջափակումը։
