Հունգարիայում ընկերությունը պատահաբար աշխատակցին իր իրական աշխատավարձը 367 անգամ գերազանցող աշխատավարձ է վճարել, հայտնում է Oddity Central-ը։
Տղամարդը կարճ ժամանակ աշխատել է Կապոշվարի ընկերությունում, սակայն փորձաշրջանից հետո նրան հեռացրել են աշխատանքից:
Ընդհանուր առմամբ, նա վաստակել է 92 549 հունգարական ֆորինտ (238 եվրո կամ մոտ 25 հազար ռուբլի), բայց սխալի պատճառով գործատուն նրան փոխանցել է 367 անգամ ավելին՝ 92 549 եվրո (ավելի քան 9,6 միլիոն ռուբլի):
Սխալը տեղի է ունեցել այն պատճառով, որ աշխատավարձը փոխանցելու համար աշխատողը նշել է ավստրիական բանկ, որտեղ տեղական արժույթը եվրո է: Սխալը հայտնաբերելուց անմիջապես հետո հունգարական ընկերությունը կապ է հաստատել նախկին աշխատակցի հետ և խնդրել նրան վերադարձնել իր բանկային հաշվին փոխանցված ավելորդ գումարը։ Նա, սակայն, հրաժարվել է կատարել իրենց խնդրանքը՝ հայտարարելով, որ, իբր, այլևս մուտք չունի այդ հաշիվ։
Հետաքննության ընթացքում պարզվել է, որ տղամարդը հասցրել է Հունգարիայի հարավում գտնվող բանկոմատի միջոցով իր ավստրիական հաշվից մոտ 15 500 եվրո կանխիկ գումար հանել և փոխանցել դրանք մեկ այլ բանկային հաշվի: Ընկերությանը հաջողվել է սառեցնել մեղադրյալի ավստրիական բանկային հաշիվը և վերադարձնել մոտ 72 000 եվրո։ Ընկերության ղեկավարությունը հույս ունի հետ ստանալ նախկին աշխատակցին փոխանցված ամբողջ գումարը։
