«Տավուշը հանուն հայրենիքի» շարժումը հայտարարություն է տարածել այն մասին, որ իշխանամետ սոցիալական ցանցերը վարկաբեկում են երթի մասնակիցներին՝ բռնության կիրառման նպատակով տեղեկատվական հող նախապատրաստելու համար։ Շարժումն իր հայտարարությանը կցել է Civic.am հեռագրային ալիքում նախկինում հրապարակված տեսանյութի սքրինշոթը։ Տեսանյութում երիտասարդը TikTok սոցիալական ցանցի ուղիղ եթերում ասում է, որ վաղը միանալու է երթին և իբր մտածում է իր հետ գաղտնի զենք վերցնելու մասին։ Կայքը պնդում է, որ սա երթի մասնակից է, սակայն դրա ապացույցը չի հրապարակել։
«Հնարավոր է, որ այսկերպ իշխանությունները նախապատրաստում են հերթական սադրանքները և հիմքեր՝ քաղաքացիների բացառապես խաղաղ երթի նկատմամբ ապօրինի ուժ կիրառելու համար»,- ասվում է շարժման տարածած հաղորդագրության մեջ։
Շարժումը հայտարարել է, որ իրենք հասարակական լայն շերտերի համար հաշտություն են քարոզում, մերժում են ցանկացած բռնություն, «իսկ բոլոր նրանք, որոնք կխոսեն հակառակի մասին, իրենց հետ կապ չունեն, մերժելի ու հատուկ ներդրված մարդիկ են»:
Մայիսի 4-ից «Տավուշը հանուն հայրենիքի» շարժումը երթ է սկսել դեպի Երևան: Կազմակերպիչները նախատեսում են երթով Երևան հասնել մայիսի 9-ի կեսօրին: Տավուշում ապրիլի 19-ի երեկոյան սկսվել էին մարզի սահմանամերձ գյուղերի բնակիչների բողոքի ակցիաները։ Տավուշից սահմանի սահմանազատում սկսելու և Ադրբեջանին մի շարք տարածքներ հանձնելու Հայաստանի իշխանությունների որոշման դեմ նրանք փակել էին Կիրանց գյուղի ճանապարհը։ Մայիսի 2-ի առավոտյան ոստիկանությունը բերման էր ենթարկել բողոքի ակցիայի 30 մասնակցի և փակել դեպի գյուղ տանող ճանապարհը:
ՀՀ ԱԳՆ-ն ապրիլի 19-ին հայտարարել էր, որ Հայաստանն ու Ադրբեջանը պայմանավորվել են սահմանազատման գործընթացն սկսել Տավուշի մարզից, ինչից հետո Տավուշի սահմանամերձ գյուղերի բնակիչները բողոքի ակցիաներ էին սկսել։ Ակցիաների պատճառ էր դարձել նաև վարչապետի աշխատակազմի՝ ավելի ուշ արված հայտարարությունը, ըստ որի սահմանազատումից հետո Զինված ուժերը նշված հատվածների շրջանում իրենց տեղը կզիջեն սահմանապահ զորքերին։ Ապրիլի 19-ից մեկնարկած ակցիաները հաջորդող օրերին սկսվել են նաև ՀՀ այլ մարզերում։ Հայաստանի և Ադրբեջանի սահմանին կոորդինատների ճշգրտման աշխատանքների շրջանակներում գեոդեզիական չափումների հիման վրա մայիսի 6-ի դրությամբ 40 սահմանային սյուն էր տեղադրվել։
