Բայրամովը ԵԱՀԿ գործող նախագահի հետ քննարկել է տարածաշրջանում տիրող իրավիճակը

Ադրբեջանի արտաքին գործերի նախարար Ջեյհուն Բայրամովը և Մալթայի արտաքին գործերի նախարար, ԵԱՀԿ գործող նախագահ Իեն Բորջը քննարկել են ԵԱՀԿ օրակարգային հարցեր, ինչպես նաև տարածաշրջանում տիրող իրավիճակը, հայտնում են ադրբեջանական լրատվամիջոցները՝ հղում անելով Ադրբեջանի արտաքին գործերի նախարարությանը։​​

Նշվում է, որ կողմերը հեռախոսազրույցի ընթացքում ուշադրության են արժանացրել Ադրբեջան-ԵԱՀԿ երկկողմ համագործակցության օրակարգի հիմնական ուղղություններն ու մարտահրավերները, որոնց բախվում է ներկայումս ԵԱՀԿ-ն։

Բայրամովը նաև իր զրուցակցին հանգամանորեն տեղեկացրել է տարածաշրջանում տիրող իրավիճակի, Ադրբեջանի և Հայաստանի միջև հարաբերությունների կարգավորման գործընթացի և խնդիրների նկատմամբ Ադրբեջանի մոտեցումների մասին։

Մայիսի 3-ին ՀՀ արտաքին գործերի նախարար Արարատ Միրզոյանը ևս հեռախոսազրույց էր ունեցել Բորջի հետ: ԱԳ նախարարներն անդրադարձել էին տարածաշրջանային հարցերի։ Միրզոյանը գործընկերոջն էր ներկայացրել Հայաստանի ու Ադրբեջանի միջև հարաբերությունների կարգավորման գործընթացում վերջին զարգացումները:

Փետրվարին Ադրբեջանի նախագահ Իլհամ Ալիևը Բորջին առաջարկել էր պաշտոնապես լուծարել ԵԱՀԿ Մինսկի խումբը և մի շարք այլ մեխանիզմներ։