Հայաստանի արտգործնախարար Արարատ Միրզոյանը կոչ է արել ուժեղացնել ԵԱՀԿ-ի արագ արձագանքման մեխանիզմները հակամարտությունների կանխարգելման գործում։
«Մինչ Հայաստանը երկար ժամանակ հետևողականորեն հանդես է եկել ԵԱՀԿ պատասխանատվության ողջ տարածքում իր սկզբունքների լիարժեք կիրառման օգտին՝ զգուշացնելով ուժի կիրառման վաղ նախազգուշացման ազդանշանների մասին և կոչ անելով արագ և վճռական գործողությունների, ԵԱՀԿ-ի մեխանիզմներն ու հակամարտությունների կանխարգելման գործիքակազմը, մեղմ ասած, շարունակել են մնալ անգործուն»,- հայտարարել է նա և կոչ արել քննադատությունն ընկալել միայն արդյունավետ անվտանգային կազմակերպության համատեքստում:
Նա հավելել է, որ տարվա ընթացքում Հայաստանը գործադրել է առավելագույն ջանքեր՝ ապահովելու, որ ԵԱՀԿ-ն դիմակայի գոյաբանական մարտահրավերներին։
«Ցավոք, մենք բոլորս ձախողեցինք մեր ջանքերում՝ թե՛ հավաքականորեն, թե՛ անհատապես»,- ասել է նա։
Միրզոյանը հայտարարել է, որ Հայաստանն ու Ադրբեջանը համաձայնության են եկել համաձայնագրի նախագծի նախաբանի և 17 հոդվածներից 15-ի շուրջ։
«Եթե լինի բավարար քաղաքական կամք, այն կարող է արագորեն վերջնականացվել և ստորագրվել»,- նշել է նա.
Միրզոյանն ընդգծել է նաև Հայաստանի շահագրգռվածությունը Թուրքիայի հետ հարաբերությունների կարգավորման հարցում։ Նա հայտարարել է, որ Երևանը կշարունակի երկխոսությունն Անկարայի հետ՝ այդ նպատակներին հասնելու համար և իրականացնել որոշ գործնական քայլեր, այդ թվում՝ Հայաստանի և Թուրքիայի միջև կամուրջի, ինչպես նաև Գյումրի-Կարս երկաթգծով սահմանային անցման տեխնիկական պահանջների համատեղ գնահատում:
«Երբ համաձայնությունները կյանքի կկոչվեն, դրանք դրական ազդեցություն կունենան տարածաշրջանի և դրա սահմաններից դուրս ժողովուրդների վրա» – ասել է ԱԳ նախարարը։
Միրզոյանն ընդգծել է Հայաստանի պատրաստակամությունը փակելու թշնամության էջը Հարավային Կովկասում։ Այդ կոնտեքստում նա ընդգծել է, որ հայկական կողմի առաջարկած «Խաղաղության խաչմերուկ» կապուղիների նախագիծը մեծ ներուժ ունի բարձրացնելու և ամրապնդելու վստահության մթնոլորտը, խթանելու տարածաշրջանի երկրների փոխգործակցությունը։
Այսօր ավելի վաղ ԵԱՀԿ գլխավոր քարտուղարի պաշտոնակատար Քեյթ Ֆերոն հայտարարել էր, որ կազմակերպությունը կկարողանա նպաստել հայ-ադրբեջանական խաղաղ գործընթացին, եթե Երևանը և Բաքուն նման խնդրանք ներկայացնեն։
Ադրբեջանի արտաքին գործերի նախարար Ջեյհուն Բայրամովը ԵԱՀԿ արտգործնախարարների խորհրդի նիստում ելույթ է ունեցել և հայտարարել, որ հայ-ադրբեջանական հարաբերությունները զգալի առաջընթաց են գրանցել՝ չնայած այն հանգամանքին, որ կազմակերպությունը, նրա խոսքով, դարձել է «վնասակար հավակնությունների պատանդ», հայտնում են ադրբեջանական լրատվամիջոցները:
