Դեպի ՌԴ տոմսերի թանկացման մասով հարկավոր է նշել, որ տոմսերի որևէ արհեստական թանկացում շուկայում տեղի չի ունեցել, ուղղակի, մեծ պահանջարկի պարագայում առավել էժան դասի տոմսերը ակնթարթորեն սպառվել են, և այժմ առկա են բացառապես թանկ դասի տոմսեր։ Այս մասին գրել է «Արմենիա» ավիաընկերության փոխտնօրեն Գևորգ Խաչատրյանը։
«Մինչև փետրվարի 1 օդանավերի ծանրաբեռնվածությունը միջինում կազմում էր 60 տոկոս, իսկ այժմ օդանավերը 100 տոկոսով ծանրաբեռնված են»,- հայտնել է նա։
Ինչպես արդեն հայտնի է՝ փետրվարի 1-ից մինչև մարտի 1-ը գործելու է պիլոտային ծրագիր, որով Հայաստանից Ռուսաստան և հակառակ ուղղությամբ ճամփորդելու համար ուղևորին թույլատրվում է պետական սահմանը հատել կորոնավիրուսի թեստի բացասական արդյունքի առկայության դեպքում (առավելագույնը 72 ժամ վաղեմության)։ Էլեկտրոնային կառավարման ենթակառուցվածքների ներդրման գրասենյակը հրապարակել է այն քայլերը, որոնք պետք է իմանան քաղաքացիները՝ ՌԴ մեկնելուց առաջ։