Հայրենիքի փրկության շարժման օրակարգը նույնն է, ոչինչ չի փոխվել։ Պետք է ազատվել գործող վարչապետից, ստեղծել ժամանակավոր կառավարություն ու ընտրել նոր վարչապետ։ Այս իշխանությունն այլևս չկա՛։
Այս մասին այսօր՝ փետրվարի 12-ին հրավիրված հավաք-քննարկմանն ասաց Հայրենիքի փրկության շարժման վարչապետի թեկնածու Վազգեն Մանուկյանը։
Պատահաբար պարզվել է, որ բացի Եռակողմ երկու հայտարարություններից, կա նաև 6 կետանոց գաղտնի ստորագրված մեկ այլ փաստաթուղթ, որով պարզ է դառնում, թե ինչ է կատարվում Սյունիքում։
Մանուկյանը նշեց, որ իշխանության հրաժարականի դեպքում Հայրենիքի փրկության շարժումը տնտեսական երկու ծրագիր է ներկայացնելու․ առաջինը` ժամանակավոր կառավարության 1 տարվա ծրագիրը` բաղկացած սոցիալ–տնտեսական հրատապ խնդիրներից, և երկրորդը` ավելի երկարածավալ ծրագիր, որը կիրագործի հաջորդ իշխանությունը։
Նիկոլ Փաշինյանը, սակայն, ըստ Մանուկյանի, ինքնակամ չի գնալու իշխանությունից․ պետք է կոտրել ոտքերը՝ հենարանները։ Կա ժողովրդի մի հատված, որը չի հասկանում, թե ինչ է կատարվում։ Այս մարդկանց պետք է բացատրել, քարոզչական աշխատանքներով, ծրագրերով հասկացնել։ Դրանով պետք է զբաղվի շարժումը, մտավորականությունը, հասարակական կազմակերպություններ ու կուսակցություններ։
Մանուկյանը պետության գլխավոր չարիք համարում է նաև «Իմ քայլը» դաշինքին։
«Նա, ով չի լքում այդ կուսակցությունը համարե՛նք պետական դավաճան»,- ասաց Մանուկյանը։
Վազգեն Մանուկյանը նախատեսում է առաջիկայում մեծաքանակ ավտոմեքենաներով մեկնել Սյունիք, իսկ փետրվարի 20-ին նախատեսվում է խոշոր հանրահավաք։