Հայաստանում պահանջարկով ձևավորված գնաճ կա, որը պայմանավորված է Ռուսաստանից կամ այլ երկրներից Հայաստան ժամանած մարդկանցով։ Քանի որ նրանք հավելյալ պահանջարկ են ձևավորել մեր ապրանքների ու ծառայությունների նկատմամբ։ Այս մասին ԱԺ-ում ասաց ԿԲ նախագահ Մարտին Գալստյանը։
Նրա խոսքով՝ Ռուսաստանում քաղաքական զարգացումների մեկ այլ հետևանք է մասնավոր հատվածի աշխատավարձերի աճը։ Տարվա ընթացքում աշխատավարձերի 18 տոկոս աճ է գրանցվել։ Մասնավորապես՝ ՏՏ ոլորտում բարձրացել են աշխատակիցների աշխատավարձերը։ Միևնույն ժամանակ ունենք գործազրկության նվազման միտում։
«Հայաստանում սկսել են աճել այնպիսի ապրանքների ու ծառայությունների գներ, որոնք պատմականորեն չեն աճել։ Օրինակ՝ վերջին 10 տարում վարսավիրական ծառայությունների աճ գրեթե չի եղել․ մենք հիմա նկատում ենք այդպիսի գների աճ»,- ասաց Գալստյանը՝ նշելով, որ դա պահանջարկով ստեղծված գնաճ է, դա մտահոգիչ փաստ է։ Այն, ինչ նորմալ է ձեթի ու հացի դեպքում, որոնք սպառողական զանգվածի մեծ մասն են կազմում։
Հայաստանը, ԿԲ նախագահի խոսքով, գտնվում է սպառողական բումի մեջ։ Արտադրանքը չի հերիքում բավարարելու այն պահանջարկը, որն առկա է երկրում։
Գալստյանը նաև նշեց, որ ԿԲ-ն ոչ թե արժևորել է դրամը, այլ ստեղծված իրավիճակով պայմանավորված՝ դրամն օբյեկտիվորեն արժևորվել է։ Առկա է 10,2 տոկոս գնաճ։
Նա նշեց, որ առանց ԿԲ-ի միջամտության այս երկրում գնաճը չի վերանալու։ Նրա խոսքով՝ պետք է մեդալի հակառակ կողմը տեսնել, որ եթե փոխարժեքները բարձրացնենք, ունենալու ենք շատ ավելի բարձր գնաճ, խարիսխները քանդվելու են, ու ԿԲ-ն աննախադեպ տոկոսադրույքներ է բարձրացնելու։ Եթե ԿԲ-ն այդպես վարվեր, ներքին պահանջարկը մեռնելու էր, այսինքն՝ տնտեսությունը սպանելու էինք, ասաց նա։
