Ֆրանսիայի առողջապահության նախարար Օլիվիե Վերանը հայտարարել է, որ 2022 թվականից մինչև 25 տարեկան բոլոր կանանց անվճար հակաբեղմնավորիչներ կառաջարկեն։ Այս մասին հայտնում է esquire.ru-ն՝ «The Guardian»-ին հղումով:
Կանայք չեն վճարի բժշկի դիմելու, թեստեր հանձնելու և հակաբեղմնավորիչ այլ միջոցառումների համար:
«Երիտասարդ կանանց կողմից հակաբեղմնավորիչների օգտագործումը նվազում է, և դրա հիմնական պատճառը ֆինանսականն է, դրանք չափազանց թանկ են», – նշել է Վերանը:
Նախարարի խոսքով՝ հակաբեղմնավորիչներ կտրվեն մինչեւ 25 տարեկան կանանց, քանի որ այդ տարիքից նրանք դառնում են ավելի ինքնավար: Նշվում է, որ 25 տարեկանից բարձր կանանց արդեն փոխհատուցվում է հակաբեղմնավորման միջոցների արժեքի մոտ 65% -ը:
Բացի այդ, ըստ իշխանությունների, մինչև այդ տարիքը կանայք ավելի հակված են հակաբեղմնավորիչներից հրաժարվելուն ոչ թե այն պատճառով, որ ցանկանում են երեխաներ ունենալ, այլ քանի որ դրանք թանկ են: Աղբյուրը նշում է՝ Ֆրանսիայի առողջապահության նախարարությունը տարեկան 21 մլն եվրո (1,8 մլրդ ռուբլի) կծախսի այս ծրագրի վրա:
Ֆրանսիայի իշխանությունները հղիութան արհեստական ընդհատումների կրճատման հասան այն բանից հետո, երբ 2013 թվականից սկսեցին անվճար հակաբեղմնավորիչներ տրամադրել 15-18 տարեկան, իսկ 2020 թվականից՝ մինչև 15 տարեկան աղջիկներին:
