Հուլիսի 2-ին լուր տարածվեց, որ ինքնասպանություն է գործել Իսահակյան գյուղի անասնաբույժը, ով չէր կատարել անասունների՝ սիբիրյան խոցի դեմ պատվաստումները: Նա 70-ամյա Ռուստամ Սիմոնյանն է, որի գործողությունների հետևանքով սատկել են մանր ու խոշոր եղջերավոր անասուններ, հիվանդանոց են տեղափոխվել գյուղի 7 բնակիչներ:
Ինքնասպանության պատճառների մասին տեղեկություն ստանալու նպատակով Armenia Today-ը կապ հաստատեց Իսահակյան գյուղի ղեկավար Արտավազդ Արսենյանի հետ: Վերջինս հաստատեց ինքնասպանության լուրը: Ասաց, որ ցնցված է կատարվածից:
«Երեկ եմ եղել նրա տանը: Զրուցել եմ մահացածի որդու և կնոջ հետ: Տեղեկացել եմ, որ մեկ ամիս առաջ էլ նա փորձել է ինքնասպան լինել: Նա մկնդեղով է փորձել վերջ տալ կյանքին, սակայն կանխվել է: Ոչ մեկը չի կարող հասկանալ, թե ինչու է նման բան արել»,- ասաց համայնքապետը:
Մեր հարցին ի պատասխան՝ Արսենյանն ասաց, որ անասնաբույժը հոգեպես խիստ հավասարակշիռ մարդ էր: Նրա խոսքերով՝ անհայտ է՝ կապ ունի՞ ինքնասպանությունը սիբիրյան խոցի հետ կապված դեպքերի հետ, թե՝ ոչ: