Լեգենդար շվեդական ABBA փոփ-խումբը թողարկել է վերջին 40 տարվա ընթացքում առաջին երկու նոր երգերը։ Երաժիշտները համացանցում ներկայացրել են «I Still Have Faith in You» («Ես դեռ հավատում եմ քեզ») դաշնամուրային բալլադը. այն ուղեկցվում է տեսահոլովակով, որտեղ նոր երաժշտությունն ուղեկցում է ABBA-ի ելույթների հին կադրերին:
Շվեդական փոփ-քառյակի «Abba Voyage» անվանումով նոր ալբոմը կթողարկվի նոյեմբերի 5-ին, իսկ այնուհետև տեղի կունենան «հոլոգրաֆիկ հյուրախաղերը», որտեղ մենակատարների վիրտուալ պատկերները «ելույթ կունենան» 10 երաժիշտներից բաղկացած խմբի ուղեկցությամբ:
Երկրորդ կոմպոզիցիան, որը հանրությանը ներկայացվել է հինգշաբթի օրը, կոչվում է «Don’t Shut Me Down»։ Ընդհանուր առմամբ, ABBA-ի նոր ալբոմում կլինի տասը երգ։
ABBA-ի երաժիշտները պատմել են, որ որոշել են ձայնագրել նոր ստեղծագործություններ, երբ աշխատել են բեմական ներկայացման վրա։ «Սկզբում մենք ունեինք ընդամենը երկու երգ, բայց հետո մենք մտածեցինք, որ, հավանաբար, արժե մի քանիսն էլ անել»,- ասում է Բեննի Անդերսոնը: Նոր ալբոմը նա նկարագրում է այսպես. «Մենք արեցինք այն ամենը, ինչ կարող էինք մեր տարիքում»։