Ռուսաստանի, Հայաստանի և Ադրբեջանի փոխվարչապետերի համանախագահությամբ տրանսպորտային հաղորդակցությունների ապաշրջափակման հարցերով Ռուսաստանի, Հայաստանի և Ադրբեջանի աշխատանքային խմբի գործունեությունը միանշանակ արդյունավետ է: Այս մասին «РИА Новости»-ին հայտնել է ՀՀ փոխվարչապետ Մհեր Գրիգորյանը:
«Ենթախմբերի փորձագետների կողմից հսկայական աշխատանք է կատարվել։ Կան կոնսենսուսներ, բայց կան նաև տարաձայնություններ, որոնց շուրջ մենք փորձում ենք լուծումներ գտնել մեր հանդիպումների ընթացքում»,- ասել է Գրիգորյանը։
Նրա խոսքով՝ առաջիկայում կհամաձայնեցվի աշխատանքային խմբի հերթական հանդիպման ամսաթիվը։
Հիշեցնենք, որ 2021 թվականի հունվարի 11-ին Մոսկվայում Ռուսաստանի, Հայաստանի և Ադրբեջանի ղեկավարների հանդիպման ժամանակ տարածաշրջանի տրանսպորտային և տնտեսական կապերի ապաշրջափակման հարցերով երեք երկրների փոխվարչապետների մակարդակով հանձնաժողով ստեղծելու պայմանավորվածություն էր ձեռք բերվել: