Այսօրվա գործընթացներին հետևելով՝ ես տպավորություն եմ ստանում, որ կան շրջանակներ, որոնց ամենակարևոր խնդիրն իրենց թողած բանակցային ժառանգության վերաբերյալ ճշմարտության հետ կապված բացահայտումն է։ Այս մասին ասաց ՀՀ վարչապետ Նիկոլ Փաշինյանը՝ խոսելով խոստացված սենսացիոն բացահայտման մասին։
Նա այս բացահայտումը պետք է աներ դեռ նախորդ հարցուպատասխանին՝ ընդդիմադիրների աչքերին նայելով, քանի որ ընդդիմադիրները հեռացել էին, այն այսօր է անում՝ կրկին առանց նրանց։
«Եվ այն, ինչ պիտի ասեմ, ես երկար ժամանակ ձեռնպահ էի մնում ասելուց, չնայած կտոր-կտոր ասել եմ։ Ասում են, որ Ղարաբաղի հարցի հասցեագրման ժամանակ պետք է հայկական կողմը հենվի և հենվեր, և հենվել է 1991 թ․ սեպտեմբերի 2-ի ԼՂԻՄ-ի անկախության հռչակման և 1991 թ․ դեկտեմբերի 10-ին տեղի ունեցած հանրաքվեի վրա, որով ԼՂ ժողովուրդը ԼՂԻՄ-ը հռչակել է անկախ»,- նշեց Փաշինյանը։
Վարչապետի պնդմամբ՝ իրենք չեն պատերազմ բերել, այլ նախկիններն են պատերազմն անոնս արել։
Փաշինյանը ևս մեկ բացահայտում արեց՝ հայտարարելով, որ Մադրիդյան սկզբունքների նախաձեռնության հեղինակը կամ համահեղինակը հայկական կողմն է։
«2007 թվականին Հայաստանը, որպես կարգավորման բանակցային հիմք, ընդունում է Մադրիդյան սկզբունքները, որտեղ ասվում է, որ ԼՂ ապագա կարգավիճակը պետք է որոշվի ապագայում տեղի ունենալիք հանրաքվեի միջոցով։ Երբ որ հայկական կողմն ընդունել է, որ այդ ապագա հանրաքվեն պետք է տեղի ունենա Ադրբեջանի հետ փոխհամաձայնության պայմաններում, ինքը կտրել է այն ճյուղը, որի վրա բոլորս նստած ենք եղել, որովհետև մենք արդարացիորեն ասել ենք, որ Լեռնային Ղարաբաղը երբեք չի եղել Ադրբեջանի կազմում, բա ինչո՞ւ ենք Ադրբեջանի հետ քննարկում։ Մադրիդյան սկզբունքներն ընդունելով՝ Հայաստանի այդ կառավարությունը, որի ներկայացուցիչներն են այսօր քաղաքում խցանումներ առաջացնում, Ադրբեջանին վետտոյի իրավունք է տվել Լեռնային Ղարաբաղի կարգավիճակի որոշման հարցում»,- ասաց նա՝ հավելելով, որ Մադրիդյան սկզբունքներն ընդունելով՝ ՀՀ այդ կառավարությունն Ադրբեջանին վետոյի իրավունք է տվել ԼՂ կարգավիճակի որոշման հարցում։
