Հայաստանը խաղաղության պայմանագրի տեքստում Ադրբեջանին առաջարկել է ստեղծել «գարանտորների» ինստիտուտ։ Այս մասին ԱԺ-ում լրագրողների հետ զրույցում ասաց ԱԽ քարտուղար Արմեն Գրիգորյանը։
«Այդ ինստիտուտը պետք է կարողանա ապահովել պայմանագրի իրականացումը, բացի դրանից՝ մենք նաև առաջարկել ենք, որ մեխանիզմ ստեղծվի հնարավոր միջազգային ինչ-որ դատարան դիմելու, եթե առաջանում է ճգնաժամ ու հնարավոր չէ լուծել այն»,- պարզաբանեց Գրիգորյանը։
Նա նշեց, որ երաշխավորի դերակատարի պատրաստակամություն հայտնող երկրները կարող են ստանձնել այդ պարտավորությունը։ Այս պահին որոշում չկա, թե որ երկրներն են լինելու դրանք։
Հարցին, թե հնարավո՞ր է մինչև տարվա վերջ խաղաղության պայմանագրի ստորագրումը, Գրիգորյանը պատասխանեց․
«Դա կախված է Ադրբեջանից։ Հայաստանը շարունակում է ջանքեր գործադրել տարածաշրջանում խաղաղություն հաստատելու ուղղությամբ և այս առումով նա իր քայլը կատարել է։
Ըստ Գրիգորյանի՝ ստեղծված ճգնաժամը ևս մեկ անգամ ցույց է տալիս Ադրբեջանի ապակառուցողական դերը տարածաշրջանում։
«Երբ խաղաղության պայմանագիր է քննարկվում, Ադբեջանը փակում է Լաչինի միջանցքը»,- ասաց նա։
Գրիգորյանն ասաց՝ չգիտի, թե բնապահպանների մեջ գեներալ, կապիտան կա՞, թե՞ ոչ, բայց որ այդ մարդիկ Ադրբեջանի պաշտպանության կառույցների ներկայացուցիչներ են, միանշանակ է։ Եվ այս առումով Ադրբեջանն է այդ շրջափակումը կազմակերպել։ Դա որևէ կապ չունի քաղաքացիական նախաձեռնության հետ։