Երևանն ու Բաքուն դեռ վերջնական համաձայնության չեն եկել խաղաղության պայմանագրի տեքստի բոլոր կետերի շուրջ, լրագրողներին հայտնեց ԱԳ փոխնախարար Վահան Կոստանյանը։
Նա նշեց, որ Հայաստանի և Ադրբեջանի ղեկավարներ Նիկոլ Փաշինյանի և Իլհամ Ալիևի կազանյան հանդիպումից հետո բանակցային գործընթացն ակտիվացել է, և հիշեցրեց, որ բանակցությունները երկար ժամանակ ընթանում են երկկողմ ձևաչափով՝ առանց երրորդ երկրների մասնակցության։
«Բայց կան գործընկերներ, որոնք իսկապես շահագրգռված են Հարավային Կովկասում խաղաղության և կայունության հաստատմամբ, և նրանք փորձում են դրական ներդրում ունենալ այս օրակարգում»,- ասաց փոխնախարարը։
Կոստանյանը վստահեցրեց, որ Հայաստանի Սահմանադրության փոփոխության հարցը չի մտնում խաղաղության պայմանագրի տեքստի մեջ։ Խաղաղության պայմանագրի տեքստը նաև չի պարունակում տարածաշրջանային հաղորդակցությունների ապաշրջափակման մասին, հավելեց նա։
«Այս հարցի շուրջ քննարկումները շարունակվում են։ Մենք արդեն տեղեկացրել ենք հանրությանը, որ երկու երկրների փոխվարչապետերը սահմանազատման հանձնաժողովների նիստից հետո առանձին քննարկել են այս հարցը»,- ասաց Կոստանյանը։
Հայաստանի ԱԳՆ նախարարի տեղակալն ասաց, որ ներկայումս Հայաստանի և Ադրբեջանի ղեկավարների կամ երկու երկրների արտգործնախարարների հանդիպման վերաբերյալ պայմանավորվածություններ չկան։ Դեռևս որոշում չկա Բաքվում կայանալիք Կլիմայի փոփոխության հարցերով ՄԱԿ-ի համաժողովին (COP29) Հայաստանի մասնակցության վերաբերյալ, հավելեց նա։
Նոյեմբերի 5-ին Հայաստանի ԱԳՆ-ն հայտնել էր, որ հայկական կողմը ստացել է Ադրբեջանի պատասխան առաջարկները խաղաղության պայմանագրի նախագծի վերաբերյալ (նախագծի 11-րդ խմբագրում):
Սեպտեմբերի 10-ին ՀՀ վարչապետ Նիկոլ Փաշինյանը հայտարարել էր, որ խաղաղության պայմանագրի նախագծի 13 հոդված և նախաբանն ամբողջությամբ համաձայնեցված են։ Օգոստոսի 31-ին ԶԼՄ ներկայացուցիչների հետ հանդիպմանը Փաշինյանը տեղեկացրել էր, որ խաղաղության պայմանագրի մասին ՀՀ-ն նոր առաջարկներ է ներկայացրել Բաքվին։ Հուլիսի 20-ին Ադրբեջանի նախագահ Իլհամ Ալիևը հայտարարել էր, որ Հայաստանի հետ խաղաղության պայմանագրի տեքստի 80-90%-ն արդեն համաձայնեցված է։
Հունիսի 6-ին Ալիևը Երևանի և Բաքվի միջև խաղաղության պայմանագրի ստորագրումն առանց Հայաստանի սահմանադրության փոփոխության «անհնար էր» անվանել։
