Իմ գնահատմամբ մեր մասնակցությունն Անթալիայի դիվանագիտական ֆորումին ճիշտ որոշում էր և ուզում եմ ասել, որ Հայաստանն ու Թուրքիան պետք է և արժի, որ կարգավորեն հարաբերությունները և բացեն սահմանները։ Այս մասին ԱԺ-կառավարություն հարցուպատասխանի ժամանակ հայտարարեց ԱԳ նախարար Արարատ Միրզոյանը։
Ըստ Միրզոյանի՝ այս ողջ գործընթացի մեջ երկու նախարարների հանդիպումը ևս իր դրական ազդեցությունն ունեցավ։ ««Որևէ կոնկրետ պայմանավորվածություն ձեռք չբերվեց, սակայն երկու կողմն էլ վերահաստատեց, որ շարունակում է երկխոսությունը՝ առանց նախապայմանների։ Տակտիկական առումով մի փոքր տարբերություններ կան, սակայն երկու կողմերն էլ հասկանում են, որ վերջնանպատակը սահմանների բացումն է»,- նշեց Միրզոյանը՝ հավելելով որ քննարկում են նաև առևտրատնտեսական և տեխնիկական մի շարք հարցեր։
Անդրադառնալով Թուրքիայի ԱԳ նախարարի հետ հանդիպման ժամանակ վերջինիս կողմից փողկապ չկրելու հետ կապված շահարկումներին՝ Միրզոյանը նշեց, որ այդ ֆորումն «առանց փողկապների» էր։ «Տարբեր լուսանկարներից կարող եք տեսնել, որ նախարարների մի մասը կրում էին փողկապներ, մյուս մասը՝ չէին կրում, նույն նախարարները կարող էին հաջորդ օրն այլ կերպ հանդես գալ։ Ֆորմատն էր այդպիսին»,- ասաց Արարատ Միրզոյանը։
