Պաշտոնական Բաքուն Երևանի հետ հարաբերությունների կարգավորման հարցում մեծ հույսեր է կապում Բրյուսելի հետ։ Այս մասին հայտարարել է Ադրբեջանի նախագահ Իլհամ Ալիևը:
«Մենք մեծ հույսեր ենք կապում Եվրոպական Միության, հատկապես Եվրոպական խորհրդի նախագահ Շառլ Միշելի ջանքերի հետ, որն արդեն ակտիվորեն մասնակցում է այդ գործընթացին։ Նա արդեն լավ ծանոթ է գործընթացին։ Ես կարծում եմ, որ դա շատ խոստումնալից միջավայր է ստեղծում հաջող բանակցությունների համար»,- այսօր ասել է Ալիևը, որն ընդունել է Հարավային Կովկասի հարցերով ԵՄ հատուկ ներկայացուցիչ Տոյվո Կլաարին։
Ալիևը նշել է, որ ապրիլի 6-ին Բրյուսելում կայացած եռակողմ հանդիպումը ելակետ է բանակցային գործընթացի զարգացման հարցում:
«Այդ ժամանակից ի վեր մենք աշխատում ենք, ԱԳՆ-ն աշխատում է, և իմ վարչակազմը կապի մեջ ձեր թիմի համար։ կարևոր է, որ երկու կողմերն էլ հավատարիմ են պայմանավորվածություններին»,- ընդգծել է Ալիևը։
Ընդ որում, Ադրբեջանի ղեկավարը Նախիջևանի Ինքնավար Հանրապետության հետ Ադրբեջանի տրանսպորտային կապի հարցի պարզաբանման անհրաժեշտություն է տեսնում․ «Ադրբեջանական կողմն արդեն ավելի քան 60 կմ երկաթգիծ է կառուցել և շինարարության ավարտն ակնկալվում է 2023 թվականին։ Ադրբեջանը նաև ակտիվորեն կառուցում է ավտոմայրուղի մինչև Հայաստանի հետ սահման»,- ասել Է Ալիևը։
Նա նշել է, որ Երևանը դեռևս ձեռնամուխ չի եղել երկաթուղային և ավտոմոբիլային ճանապարհների խնդիրների լուծմանը․ «Ցավոք, Հայաստանում մինչ օրս տեխնիկատնտեսական հիմնավորման չեն անցել, ինչը վկայում է այն մասին, որ գործընթացը կարող է ձգձգվել։ Ցավոք, Բրյուսելում կայացած հանդիպման ժամանակ Հայաստանի վարչապետը չի հստակեցրել ավտոմոբիլային ճանապարհի աշխարհագրական կոորդինատները։ Ես այդ հարցը բարձրացրել եմ փետրվարի 4-ի տեսակոնֆերանսին, բայց պատասխան չի եղել։ Ապրիլի 6-ին ես կրկին խնդրեցի ճանապարհի աշխարհագրական կոորդինատները, բայց պատասխան չեղավ։ Հուսով եմ՝ դրանք մոտ ժամանակներս կստանանք»։
Ալիևը հավելել է, որ «շրջադարձային կետ» է համարում, որ Հայաստանն ընդունում է հարաբերությունների կարգավորման համար Ադրբեջանի առաջարկած 5 սկզբունքները․ «Մենք դրական ենք գնահատում այդ մասին հայկական կողմի համապատասխան հայտարարությունները։ Այժմ ժամանակն է, որ երկու կողմերն ապացուցեն իրենց լրջությունը բանակցությունների սեղանի շուրջ»։
Կլաարն իր հերթին նշել է, որ Ադրբեջան այցի նպատակը համաձայնեցված հարցերի իրականացումն ու շարունակումն ապահովելն է: Նա նաև նշել է, որ շաբաթվա երկրորդ կեսին կմեկնի Երևան։
Հիշեցնենք, որ ապրիլի 6-ին Բրյուսելում տեղի է ունեցել Նիկոլ Փաշինյանի, Շառլ Միշելի և Իլհամ Ալիևի եռակողմ հանդիպումը։
Հանդիպման արդյունքներով Հայաստանի և Ադրբեջանի միջև մինչև ապրիլի վերջ սահմանների դելիմիտացիայի հարցերով երկկողմ հանձնաժողով ստեղծելու պայմանավորվածություն է ձեռք բերվել։ Շառլ Միշելը նշել է Ալիևի և Փաշինյանի կողմից իրենց երկրների միջև խաղաղ համաձայնագրի շուրջ արագ առաջ շարժվելու ցանկությունը: Հայաստանի վարչապետը և Ադրբեջանի նախագահը ԱԳ նախարարներին հանձնարարել են մեկնարկել երկու երկրների միջև խաղաղության բանակցությունների նախապատրաստական աշխատանքները: