Թուրքիայի հարավ-արևելքում գտնվող Ղահրամանմարաշ նահանգում 4,8 մագնիտուդ ուժգնությամբ երկրաշարժ է տեղի ունեցել, հայտնում է РИА Новости-ն՝ հղում անելով Եվրոպական միջերկրածովյան սեյսմոլոգիական կենտրոնին (EMSC): Հնարավոր զոհերի և ավերածությունների մասին տեղեկություններ չկան։
«Երկրաշարժը գրանցվել է UTC ժամանակով 5.14-ին: Ստորգետնյա ցնցումների էպիկենտրոնը գտնվել է Գեքսուն քաղաքից չորս կիլոմետր հարավ-արևելք: Օջախը գտնվել է երկու կիլոմետր խորության վրա»,- ասված է կենտրոնի հաղորդագրության մեջ։
Հիշեցնենք, որ Թուրքիայի հարավ-արևելքում գտնվող Ղահրամանմարաշ նահանգում փետրվարի 6-ին ինը ժամ ընդմիջումով 7,7 և 7,6 մագնիտուդ ուժգնությամբ երկրաշարժեր էին տեղի ունեցել։ Ցնցումները զգացվել են երկրի 11 նահանգներում և հարակից երկրներում, այդ թվում՝ Սիրիայում։ Թուրքիայի իշխանությունները երկրաշարժն անվանել են «դարի աղետ»։ Վերջին տվյալներով՝ երկրում տարերքի զոհ է դարձել ավելի քան 49 հազար մարդ։