Իրանի խորհրդարանի պատգամավորները դատապարտել են Ադրբեջանի կողմից Իսրայելում դեսպանատան բացումը: Խորհրդարանի 210 պատգամավոր իրենց հայտարարության մեջ ընդգծել են, որ Ադրբեջանի կառավարությունը կատարել է «անհավանական արարք, որը հակասում է իսլամական աշխարհի շահերին», հաղորդում է ИРНА-ն:
«Ադրբեջանցի պաշտոնյաների այս քայլը տարբեր բացասական քաղաքական հետևանքներ կունենա, և մուսուլմանները նրանց կդիտարկեն որպես Սիոնիստական ռեժիմի հանցակիցներ ճնշված պաղեստինցիների դեմ նրա հանցագործություններում», – ասվում է հայտարարության մեջ:
Պատգամավորները կոչ են արել Իրանի արտգործնախարարությանը միջոցներ ձեռնարկել այդ կապակցությամբ, ինչպես նաև կոչ են արել արաբական և իսլամական երկրների կառավարություններին, Իսլամական համագործակցության կազմակերպությանը և միջխորհրդարանական միությանը դատապարտել Բաքվի գործողությունները:
Թել Ավիվում Ադրբեջանի դեսպանատունը բացվել է մարտի 29-ին, բացման արարողությանը մասնակցել է երկրի ԱԳ նախարար Ջեյհուն Բայրամովը: 2022 թվականի նոյեմբերի 18-ին Ադրբեջանի խորհրդարանը հավանություն է տվել Իսրայելում երկրի դեսպանատուն բացելու մասին օրենքին։
