Ադրբեջանն Արցախին տրվող ֆրանսիական մարդասիրական օգնությունն անվանում է «ոտնձգություն» իր ինքնիշխանության դեմ

Ադրբեջանի ԱԳՆ-ն հայտարարել է, որ Ֆրանսիայի կողմից Լաչինի միջանցքով մարդասիրական օգնություն ուղարկելն «ուղղակի միջամտություն է Ադրբեջանի ներքին գործերին» և ոտնձգություն նրա «ինքնիշխանության և տարածքային ամբողջականության դեմ», հաղորդում են ադրբեջանական լրատվամիջոցները։

Գերատեսչությունը բողոքի նոտա է հանձնել Ֆրանսիայի դեսպան Անն Բուայոնին Ֆրանսիայի կողմից մարդասիրական օգնություն ուղարկելուց և ֆրանսիական քաղաքների ղեկավարների, այդ թվում՝ Փարիզի քաղաքապետ Անն Իդալգոյի (Գորիսում կայացած մամուլի ասուլիսում) հայտարարություններից հետո։

Ավելի վաղ ֆրանսիացի լրագրող Գաբրիել Գաբոնը հայտնել էր, որ Ֆրանսիայից մարդասիրական օգնության շարասյունը Երևանից մեկնել է Արցախ։ Օգոստոսի 25-ին Փարիզի քաղաքապետը Ֆրանսիայի իշխանություններին խնդրել էր մարդասիրական ավտոշարասյուն ուղարկել Լեռնային Ղարաբաղ։ Այս մասին Իդալգոյին կոչ էր արել Ֆրանսիայի հայկական կազմակերպությունների համակարգող խորհուրդը (CCAF):

Օգոստոսի 28-ին Ֆրանսիայի նախագահ Էմանուել Մակրոնը խոստացել էր «նոր դիվանագիտական ​​նախաձեռնություն»՝ Ադրբեջանի կողմից Լաչինի միջանցքի շրջափակումը վերացնելու համար։

Արցախը շրջափակման մեջ է 2022 թվականի դեկտեմբերի 12-ից։ Հունիսի 15-ից ադրբեջանական կողմը ամբողջությամբ արգելափակել է Լաչինի միջանցքը՝ թույլ չտալով մարդասիրական ուղևորափոխադրումներն ու բեռնափոխադրումները, ինչպես նաև արգելել է ԿԽՄԿ-ի միջնորդությամբ Արցախից Հայաստան հիվանդների տեղափոխումը։ Հուլիսի 26-ին Երևանից Արցախ է ուղարկվել 19 բեռնատար՝ 400 տոննա մարդասիրական բեռով, մասնավորապես՝ ալյուր, կարագ, մանկական սնունդ, մակարոնեղեն և առաջին անհրաժեշտության ապրանքներ։ Ավելի ուշ հայտնել էինք, որ «Սնունդ կյանքի համար» 400 տոննա մարդասիրական օգնությամբ բեռնատարների շարասյունը գտնվում է Կոռնիձորի սահմանային հատվածում։ Ադրբեջանի ԱԳՆ-ն «սադրանք» է անվանել Հայաստանի կողմից Արցախ մարդասիրական օգնություն ուղարկելը և թույլ չի տալիս հումանիտար բեռների մուտքն Արցախ։