Երեքուկես տարվա քննարկումներից հետո «ձեռք բերված պայմանավորվածություն» արտահայտությունը համարում ենք ուշացած, հայտարարել է Ադրբեջանի արտգործնախարար Ջեյհուն Բայրամովը՝ անդրադառնալով ՀՀ վարչապետ Նիկոլ Փաշինյանի՝ կոմունիկացիաների բացման մասին հայտարարություններին։
«Այս պայմանավորվածությունը պետք է վաղուց ձեռք բերված լիներ։ Եթե պաշտոնական փաստաթուղթ դեռ չկա, եթե Հայաստանն այս ուղղությամբ աշխատանքներ չի սկսել, ապա բաց հարցեր կան»,- ասել է Բայրամովը։
Նրա խոսքով՝ Ադրբեջանի տարածքում «արագ տեմպերով աշխատանքներ են տարվում տրանսպորտային և կապի ենթակառուցվածքի ստեղծման ուղղությամբ, որը շուտով կհասցվի Հայաստանի հետ սահմանին»։
Բայրամովն անդրադարձել է նաև Ադրբեջանի և Հայաստանի միջև մինչև տարեվերջ խաղաղության պայմանագրի ստորագրման հավանականությանը՝ նշելով, որ բանակցային գործընթացը բաղկացած է երկու բաղադրիչից։
«Դրանցից մեկը ֆիզիկական շփումներն են, սակայն ներկայումս ադրբեջանական պատվիրակության հիմնական ուշադրությունը կենտրոնացած է COP29-ի վրա: Այդ պատճառով առերես հանդիպումների անցկացումը մինչև դեկտեմբեր հնարավոր չէ»,- ասել է Բայրամովը։
Նոյեմբերի 13-ին Փաշինյանը հայտարարել էր, որ տարածաշրջանային կոմունիկացիաների բացման հարցում կարող ենք ունենալ լուծում, որն, ըստ էության, կարող է հասցեագրել և փոխադարձ ու լիարժեքորեն լինել ընդունելի։ Նա նշել էր, որ առաջարկն արդեն գրավոր ձևով փոխանցել են Ադրբեջանին։
Փաշինյանը և Ադրբեջանի նախագահը հանդիպել էին հոկտեմբերի 24-ին՝ Կազանում։ Ըստ պաշտոնական հաղորդագրության՝ նրանք ԱԳՆ ղեկավարներին հանձնարարել էին շարունակել բանակցությունները խաղաղության համաձայնագրի շուրջ, քննարկել էին նաև սահմանազատման հարցը։
